Bihar Politics : बिहारमध्ये राजकीय खळबळ, नितीश कुमारांचे फर्मान- आमदारांनी पुढील ७२ तास पाटणाबाहेर जाऊ नये
पुढारी ऑनलाईन डेस्क : बिहारच्या राजकारणात प्रचंड खळबळ उडाली आहे. एकीकडे लालू प्रसाद यादव यांच्या राष्ट्रीय जनता दलाने (आरजेडी) भारतीय जनता पक्ष (भाजप) आणि केंद्र सरकारविरोधात पोस्टर युद्ध छेडले आहे. दुसरीकडे, नितीश कुमार, जे आता भाजपसोबत राज्यात युतीचे सरकार चालवत आहेत, त्यांनी त्यांच्या जनता दल युनायटेड (जेडीयू) पक्षाच्या आमदारांना पुढील 72 तास पाटण्यात राहण्याचे फर्मान जारी केले आहे. सीएम नितीश यांच्या या निर्णयानंतर राजकीय खळबळ उडाली आहे. बिहारच्या राजकारणासाठी पुढील 72 तास अत्यंत महत्त्वाचे असल्याचे बोलले जात आहे. (bihar politics cm nitish kumar order all jdu mla not go out of patna)
मिळालेल्या माहितीनुसार, मुख्यमंत्री नितीश कुमार आपल्या पक्षाचे नेते आणि आमदारांसोबत वारंवार बैठका घेत आहेत. सीएम नितीश यांची सक्रियता पाहता राज्यातील सत्ताकारणात राजकीय उलथापालथ होण्याची चर्चा रंगली आहे. भाजपपासून फारकत घेऊन नितीशकुमार पुन्हा एकदा राजदसोबत सरकार स्थापन करण्याचा विचार करत आहेत का? या सर्व प्रश्नांची उत्तरे येत्या 72 तासांत मिळू शकतात, असे मानले जात आहे. (bihar politics cm nitish kumar order all jdu mla not go out of patna)
मुख्यमंत्री नितीश कुमार यांनी एक दिवस आधी पक्ष कार्यालयात त्यांचे मंत्री आणि आमदार तसेच माजी आमदारांची भेट घेतली. बिहारमध्ये सुरू असलेल्या राजकीय उलथापालथीच्या पार्श्वभूमीवर मुख्यमंत्री नितीश कुमार यांनी 27 मे रोजी जातनिहाय जनगणनेबाबत सर्वपक्षीय बैठक बोलावली आहे. बैठकीत सर्वांचे मत घेतले जाणार असल्याचे त्यांनी सांगितले. त्यानंतर हा प्रस्ताव राज्य मंत्रिमंडळासमोर ठेवला जाईल. 27 मे रोजी होणाऱ्या बैठकीबाबत काही पक्षांशी चर्चा झाल्याचे त्यांनी सांगितले. इतर पक्षांच्या प्रतिसादाची प्रतीक्षा आहे.
बिहारच्या राजकारणात काहीतरी मोठे होण्याची अपेक्षा आहे. नितीश कुमार यांनीही त्यांच्या पक्षाच्या आमदारांना पुढील ७२ तास पाटण्यात राहण्याचे आदेश दिले आहेत. यानंतर त्यांनी जात गणनेबाबत सर्वपक्षीय बैठक घेण्याची घोषणा केली आहे. गेल्या काही घडामोडींवर नजर टाकली असता, यापूर्वी झालेल्या इफ्तार पार्ट्याही नितीश आणि विरोधी पक्षनेते तेजस्वी यादव यांच्यातील अंतर संपवण्याचे काम करत होत्या.
दुसरीकडे जात जनगणनेच्या मुद्द्यावर आरजेडी आणि नितीशकुमार यांचे आधीच एकमत आहे. अशा स्थितीत नितीश लवकरच भाजपला मोठा धक्का देऊ शकतात, असे मानले जात आहे. नितीश आणि आरजेडी जात जनगणनेची मागणी करत आहेत, तर भाजप या मुद्द्यापासून दूर राहण्याचा प्रयत्न करत आहे. (bihar politics cm nitish kumar order all jdu mla not go out of patna)
आरजेडीनंतर नितीश यांचा पक्ष जेडीयूनेही इफ्तार पार्टी दिली ज्यामध्ये तेजस्वी यादव आणि लालू कुटुंबातील सर्व सदस्यांना बोलावण्यात आले. जेडीयूच्या इफ्तार पार्टीत तेजस्वी यादवही पोहोचले. दोघांच्या भेटीची जोरदार चर्चा झाली. बिहारमधील जात जनगणनेच्या मुद्द्यावर नितीश कुमार आणि तेजस्वी यादव यांनी बंद दाराआड बैठकही घेतली.
तेजस्वी यादव यांनी बिहारमध्ये जात जनगणना करण्याच्या मुद्द्यावर नितीश कुमार यांच्याकडे भेटीची वेळ मागितली होती आणि नितीश यांनी त्यांना 24 तासांच्या आत बैठकीसाठी बोलावले. बैठकीदरम्यान नितीश यांनी तेजस्वी यांना आश्वासन दिले की ते जात गणनेच्या बाजूने आहेत आणि यासाठी लवकरच सर्वपक्षीय बैठक बोलावतील.
लालू कुटुंबावर सीबीआयचा छापा राजकीय होता का?
लालू प्रसाद यादव आणि त्यांच्या कुटुंबाशी संबंधित 17 ठिकाणांवर केंद्रीय अन्वेषण विभागाने (सीबीआय) टाकलेले छापे राजकीय असल्याची चर्चा बिहारच्या राजकीय वर्तुळात रंगली आहे. भाजपसोबतची युती तोडून नितीश कुमार राजदसोबत सरकार स्थापन करण्यासाठी जातील, अशीही चर्चा होती. पण जेडीयू आणि आणि राजद यांची युती थांबवण्यासाठी लालू कुटुंबावर सीबीआयची धाड पडल्याचा आरोप करण्यात आला आहे.
सीबीआयच्या छाप्यादरम्यान नितीश मंत्र्यांच्या भेटीगाठी घेत होते
20 मे रोजी मुख्यमंत्री नितीश कुमार आपल्या मंत्री आणि आमदारांसोबत बैठक घेत होते. त्याचवेळी सीबीआयने लालू यादव आणि त्यांच्या कुटुंबीयांच्या घरांवर छापे टाकले. तथापि, असा दावा करण्यात आला आहे की सीएम नितीश यांनी आमदारांशी बैठकीत आरसीपी सिंह यांना राज्यसभेवर पाठवण्याच्या मुद्द्यावर चर्चा केली आणि आमदारांनी नितीश यांना याबाबत निर्णय घेण्याचे अधिकार दिले.
नितीश तेजस्वी यांची वाट पाहत आहेत?
सीबीआयने लालू कुटुंबावर छापा टाकण्याच्या एक दिवस आधी, तेजस्वी यादव एका आंतरराष्ट्रीय परिषदेत सहभागी होण्यासाठी लंडनला रवाना झाले होते. तेजस्वी यादव आज ना उद्या परत येऊ शकतात असे बोलले जात आहे. अशा स्थितीत भाजपसोबतची युती तोडण्याबाबत अंतिम निर्णयापर्यंत पोहोचण्यापूर्वी नितीशकुमार तेजस्वी यादव लंडनहून परतण्याची वाट पाहत आहेत का, असा प्रश्नही उपस्थित होत आहे.
आरसीपी सिंह यांचे काय होणार?
जेडीयू कोट्यातून केंद्र सरकारमधील मंत्री असलेले आरसीपी सिंह हे जेडीयूचे राज्यसभेचे सदस्य आहेत आणि त्यांचा कार्यकाळ 7 जुलै रोजी संपत आहे. नितीश कुमार त्यांच्या सहकाऱ्याला पुन्हा राज्यसभेवर पाठवणार नाहीत, अशी अटकळ बांधली जात आहे. असे झाल्यास आरसीपी सिंह केंद्रीय मंत्रीपदावर राहू शकणार नाहीत आणि नितीश कुमारांचे हे पाऊल जेडीयूने भाजपशी फारकत घेण्याचा निर्णय घेतल्याचेही संकेत असेल असे मानले जात आहे.
10 जून रोजी राज्यसभेसाठी निवडणूक होणार आहे. यासाठी 24 ते 30 मे दरम्यान नामांकन करावे लागेल. नितीश कुमार यांनी अद्याप आरसीपी सिंह यांच्याबाबत आपले पत्ते उघडलेले नाहीत. वेळ आल्यावर राज्यसभेचा उमेदवार जाहीर केला जाईल, असे यापूर्वीच नितीश यांनी स्पष्ट केले आहे.
आरसीपी सिंह यांच्यावर नितीश नाराज?
मुख्यमंत्री नितीश कुमार आरसीपी सिंह यांच्यावर नाराज असल्याचेही बोलले जात आहे. गेल्या वर्षी नरेंद्र मोदी मंत्रिमंडळाचा विस्तार झाला आणि जेडीयू सरकारमध्ये सामील होणार होता, तेव्हा नितीश कुमार यांनी भाजपशी चर्चेची जबाबदारी आरसीपी सिंग यांच्यावर सोपवली होती, असे सूत्रांनी स्पष्ट केले. तेव्हा नितीश यांना जेडीयूसाठी दोन कॅबिनेट पदे आणि दोन राज्यमंत्री हवे होते. जेडीयूचे तत्कालीन अध्यक्ष आरसीपी सिंह यांनी भाजपने केंद्रात फक्त एकच कॅबिनेट मंत्रिपदाच्या ऑफरवर डील फायनल केली आणि ते स्वतः मंत्री झाले.
मुंगेरचे खासदार लालन सिंह यांनीही आरसीपी सिंह यांच्या भाजपसोबतच्या व्यवहारावर नाराजी व्यक्त केली होती. आरसीपी सिंह जेडीयूमध्ये असतानाही भाजपसाठी काम करतात, असा आरोप त्यांच्यावर केला जात आहे. त्यामुळे आरसीपी सिंह यांना पुन्हा राज्यसभेवर पाठवण्यासाठी नितीश सकारात्मक नसल्याची चर्चा आहे.
नितीश कुमार काय करणार?
आता सर्वांच्या नजरा नितीशकुमार यांच्याकडे लागल्या आहेत. आरसीपी सिंह यांच्याबाबत कोणताही निर्णय घेणे हे नितीश कुमार यांच्यासमोर सर्वात मोठे आव्हान आहे. जर त्यांनी आरसीपी सिंह यांचे तिकीट कापले तर जेडीयूमध्ये फूट पडू शकते हे नितीश कुमार यांनाही माहीत आहे. जेडीयूचे सुमारे अर्धा डझन खासदार आणि 15 हून अधिक आमदार आरसीपी यांचे समर्थक मानले जातात. आता पाहावे लागेल की सीएम नितीश कोणते मोठे पाऊल उचलतात, ज्यासाठी त्यांनी आपल्या आमदारांना पाटण्यातच राहण्याच्या सूचना दिल्या आहेत.
ज्ञानवापी प्रकरणी सर्वोच्च न्यायालयात आणखी एक याचिका दाखल https://t.co/EOzhYDgoI1 #pudharionline #pudharinews #petition #supreme_court #gyanvapi_case #Gyanvapi #GyanvapiFiles #SupremeCourt
— Pudhari (@pudharionline) May 23, 2022