उत्तराखंड मुख्यमंत्रीपदासाठी धामी, सतपाल महाराज, डॉ. धनसिंह रावत यांची नावे आघाडीवर

नवी दिल्ली पुढारी वृत्तसेवा :  उत्तराखंड विधानसभा निवडणुकीत भारतीय जनता पक्षाने बहुमत प्राप्त केले असले तरी पक्षाला अद्यापपर्यंत मुख्यमंत्री पदाचा उमेदवार निश्चित करता आलेला नाही. या पार्श्वभूमीवर सोमवारी मुख्यमंत्री पदाच्या उमेदवारावर शिक्कामोर्तब केले जाणार आहे. नवनिर्वाचित आमदारांच्या बैठकीत मुख्यमंत्र्याचे नाव जाहीर केले जाईल, अशी माहिती सूत्रांनी दिली आहे.

कार्यवाहक मुख्यमंत्री पुष्करसिंग धामी यांच्यासह सतपाल महाराज, डॉ. धनसिंह रावत, ऋतु खंडूडी आदी नावे मुख्यमंत्री पदासाठी चर्चेत आहेत. केंद्रीय नेतृत्वाच्या निर्देशावरून धामी तसेच प्रदेशाध्यक्ष मदन कौशिक यांनी रविवारी दिल्लीत केंद्रीय गृहमंत्री अमित शहा आणि भाजपचे राष्ट्रीय अध्यक्ष जे. पी. नड्डा यांची भेट घेतली. बैठकीस माजी मुख्यमंत्री त्रिवेंद्रसिंह रावत, संघटन सचिव बी. एल. संतोष हेही उपस्थित होते. तत्पूर्वी रावत यांनी स्वतंत्रपणे नड्डा व संतोष यांची भेट घेतली होती.