पाथर्डी शहर; पुढारी वृत्तसेवा
पाथर्डी शहर हद्दीतील चितळे वस्तीवर अज्ञात सहा दरोडेखोरांनी दरोडा टाकून तीन वयोवृद्धांना जबर मारहाण केली. यावेळी लिंबाजी नाथ चितळे हे गंभीर जखमी होऊन ते अंत्यवस्थेत आहेत. लिंबाजी नाथ चितळे (वय ६५), बाबुराव गुणाजी उळगे (वय ६५), कमलबाई लिंबाजी चितळे (वय ५८) सर्व रा. शेवगावरोड, चितळेवस्ती,पाथर्डी यांना कुऱ्हाडीच्या दांड्याच्या साह्याने मारहाण करण्यात आली. जखमींच्या डोक्याला जबर मार लागला असून, हातही फॅक्चर झाला आहे.
या विषयी अधिक माहिती अशी की, शुक्रवारी मध्यरात्री अडीच ते तीन वाजण्याच्या सुमारास शेवगाव रोडवरील प्रेमश्री पेट्रोल पंपासमोर राहणाऱ्या लिंबाजी चितळे यांच्या घरावर सहा दरोडेखोरानी दरोडा टाकला. प्रथम दरोडेखोरांनी बाहेर झोपलेल्या कमलाबाई चितळे यांना जबर मारहाण केली.
त्यांनतर घराचा दरवाजा तोडून घरात झोपलेल्या लिंबाजी चितळे, बाबुराव गुणाजी उळगे, लक्ष्मीबाई उळगे यांच्यापैकी लिंबाजी व बाबुराव यांना जबर मारहाण करण्यात आली. लक्ष्मीबाई उळगे (रा .शेवगावरोड,चितळेवस्ती,पाथर्डी) यांनी त्यांच्याकडील गळ्यातील सोन्याचे मंगळसूत्र, कानातील सोन्याचे दागिने दरोडेखोरांना काढून दिले. त्यांना मात्र दरोडे खोरांनी मारहाण केली नाही. या घटनेत सोन्याच्या दागिन्यांसह २० हजारांची रोख रक्कम आरोपींनी लांबवली आहे.
