चंद्रपूर; पुढारी वृत्तसेवा : चंद्रपूर जिल्ह्यातील गोडपिपरी तालुक्यातील कोठारी वनक्षेत्रा अंतर्गत येणाऱ्या पाचगाव नियत क्षेत्रात वाघाची शिकार करून अवयव विक्री करीत असताना नागपूर मार्गावरील बुटीबोरी येथे मुद्देमालासह आरोपीला अटक करण्यात आली.
चंद्रपूर जिल्ह्यातील गोंडपिपरी तालुक्यातील पाचगाव हे वनक्षेत्र वनहक्क दाव्याअंतर्गत वनसंवर्धन करण्यासाठी अनुसुचित जमाती प्रवर्गाला इतर पारंपरिक वननिवासी म्हणून वनसमितीला हस्तांतरण करण्यात आले. मात्र, येथील वनसमितीचे लाभार्थी वन्य प्राण्यांची शिकार करून त्यांच्या अवयवाची विक्री करीत असल्याची बाब उघड झाली आहे.
पाचगाव येथील महादेव आळकू टेकाम हा वाघाचे अवयव विक्रीसाठी घेऊन जात असताना बुटीबोरी वनक्षेत्राचे वनक्षेत्राधिकारी एल. व्ही. ठोकड यांच्या पथकाने ताब्यात घेतले. ही घटना रविवारी रात्री निदर्शनास आल्याने मुद्दे मालासह आरोपी ताब्यात घेऊन कारवाई करण्यात आली.
चौकशीत चंद्रपूर जिल्ह्यातील गोंडपिपरी तालुक्यातील पाचगाव व कोठारी वनक्षेत्रातील नियत क्षेत्र असल्याने तपास चक्रे या दिशेने गतीमान झाली. तपास अधिकारी एल. व्ही. ठोकड यांच्यासह कोठारीचे वनक्षेत्र अधिकारी संदीप लंगडे, राजुरा फिरते पथकाचे अधिकारी विनायक नरखेडकर, व बल्लारपूर फिरते पथकाचे अधिकारी गादेवार आणि वनकर्मचाऱ्यांनी आरोपींच्या गावी झडती घेतली.
या तपासावेळी शिकारीचे अवजारे आढळून आली. त्याचसोबत मुख्य आरोपी महादेव आळकू टेकाम (वय ५०), विजय लक्ष्मण आलाम (वय ४५), रामचंद्र नागो आलाम (वय ५५) यांना ताब्यात घेण्यात आले. आणि यांना तपासासाठी बुटीबोरी वनक्षेत्राकडे रवाना करण्यात आले आहे.
चौथा आरोपी लकव्याने पिडित असल्यामुळे त्यास मुभा दिल्याची माहिती सुत्रांनी दिली आहे. पुढील तपास बुटीबोरी वनक्षेत्राचे वनक्षेत्राधिकारी करीत आहेत. ज्या भागातून आरोपीना ताब्यात घेण्यात आले होते ते क्षेत्र अनुसुचित जमाती व इतर पारंपरिक वननिवासी म्हणून वनसमितीला हस्तांतरण करण्यात आलेले आहे. या घटनेच्या तस्करी मागे कोणाचा हात असल्याचा संशयाने पोलिस पुढिल तपास करत आहेत.
हेही वाचलं का?
