यवतमाळ : पुढारी वृत्तसेवा : बेल पुडा विक्रेत्याचा वर्दळीच्या रस्त्यावर चाकूने भोसकून खून करण्यात आला. ही घटना रविवारी (दि.१८) रात्री शहरातील लोहारा परिसरातील देवीनगर येथे घडली. श्रावण सोमवार असल्याने सायकलवरून बेल पुडा विक्री करत देवीनगर येथील घरी परत येत असताना एकाने चाकूने छातीत वार करून हत्या केली. ही घटना अनेकांच्या समक्ष घडल्याने परिसरात दशहतीचे वातावरण निर्माण झाले आहे. (Yavatmal News)
रामनाथ सोनटक्के (वय ५०) असे मृताचे नाव आहे. तो कोळंबी फाटा येथून रोजगाराच्या शोधा लोहरा येथे राहत होता. त्याने देवीनगर भागातच किरायाने खोली घेतली होती. श्रावण महिन्यात बेलपुडा विक्री करून कुटुंबाचे भरण पोषण करत होता. रविवारी दिवसभर परिसरात बेलपुडा विक्री करून घराकडे परत जात असताना एकाने त्याच्यावर चाकून वार केले. चाकूचा घाव थेट छातीवर बसल्याने रामनाथ जागेवरच कोसळला. परिसरातील नागरिकांनी घटनेची माहिती पोलिसांना दिली. पोलिस येईपर्यंत रामनाथ रक्ताच्या थारोळ्यात पडून होता. (Yavatmal News)