Washim Illegal Moneylending
वाशिम : शहर व तालुक्यात सुरू असलेल्या कथित अवैध सावकारी व्यवहारांविरोधात सहकार विभागाने मोठी धडक कारवाई करत सात जणांच्या निवासस्थान व व्यवसाय ठिकाणी एकाचवेळी झडती घेतली. या कारवाईत आवश्यक कागदपत्रे जप्त करण्यात आली असून, सावकारी प्रकरण उघडकीस आले आहे. ही कारवाई सहकार, महसूल व पोलिस प्रशासनाच्या संयुक्त सहभागातून पार पाडण्यात आली.
वाशिम शहर व तालुक्यात सुरू असलेल्या कथित अवैध सावकारी व्यवहारांविरोधात सहकार विभागाने मोठी धडक कारवाई करत सात जणांच्या निवासस्थान व व्यवसाय ठिकाणी एकाचवेळी झडती घेतली. या कारवाईत आवश्यक कागदपत्रे जप्त करण्यात आली असून, सावकारी प्रकरण उघडकीस आले आहे. ही कारवाई सहकार, महसूल व पोलिस प्रशासनाच्या संयुक्त सहभागातून पार पाडण्यात आली. खासगी सावकारीमुळे नागरिकांची आर्थिक पिळवणूक होत असल्याच्या तक्रारी वाशिम शहरातील महेश गुरुमुखदास रामवाणी (रा. सिंधी कॅम्प) आणि राम सत्यनारायण यादव (रा. शुक्रवार पेठ) यांनी सहकार विभागाकडे दाखल केल्या होत्या. या तक्रारींच्या अनुषंगाने प्राथमिक चौकशी करण्यात आली.
त्यामध्ये अवैध सावकारीचे पुरावे आढळून आल्याने महाराष्ट्र सावकारी (नियमन) अधिनियम २०१४ च्या कलम १६ अंतर्गत पुढील चौकशीसाठी २२ जानेवारी रोजी ही झडती कारवाई करण्यात आली. या कारवाईत सहकार विभागाच्या ८ पथकांनी वाशिम शहर व तालुक्यातील सात कथित सावकारांच्या ठिकाणी धाड टाकली. यामध्ये गिरधारीलाल जगन्नाथ अग्रवाल (संतोष विहार, गुरुवार बाजार), मारोती विठ्ठल ठाकरे (खरोळा), सुरज बालू सातपुते (निमजगा), स्वप्नील राजेश इंगोले (पाटणी कमर्शियल), अजय प्रकाश इंगळे (सोनखास रोड, लाखाळा), राहुल ऊर्फ बंटी प्रकाश सिरसाट (अल्लाडा प्लॉट) आणि वाजीद खान समशेर खान (बागवानपूरा, वाशिम) यांचा समावेश आहे.
झडतीदरम्यान कथित सावकारी व्यवहारांशी संबंधित कोरे धनादेश, कोरे स्टॅम्प, रोकडवह्या, खतावणी, इसारचिठ्ठ्या तसेच स्थावर मालमत्तेची खरेदीखते आढळून आली. ही सर्व कागदपत्रे पंचनाम्याद्वारे ताब्यात घेण्यात आली असून, त्याच्या आधारे पुढील सखोल चौकशी सुरू करण्यात आली आहे. सदर झडती कारवाई जिल्हाधिकारी योगेशकुमार कुंभेजकर, जिल्हा पोलिस अधीक्षक अनुज तारे, विभागीय सहनिबंधक गौतम वर्धन (अमरावती) आणि जिल्हा निबंधक (सावकारी) तथा जिल्हा उपनिबंधक सहकारी संस्था गितेशचंद्र साबळे यांच्या मार्गदर्शनाखाली पार पडली.
ही कारवाई सहकार प्रशासन व लेखापरीक्षण विभागातील एकूण ३८ कर्मचाऱ्यांच्या ८ पथकांमार्फत पार पाडण्यात आली. झडती पथकांसोबत महसूल विभागातील १६ ग्राम महसूल अधिकारी शासकीय पंच म्हणून नियुक्त करण्यात आले होते. तसेच कारवाईदरम्यान कायदा व सुव्यवस्था अबाधित राहावी यासाठी पोलिस अधीक्षक कार्यालयातील विविध शाखांमधील १६ पोलिस अधिकारी व कर्मचारी यांचा चोख बंदोबस्त ठेवण्यात आला होता.
