Washim | एकीकडे अल्प पाऊस, दुसरीकडे पाण्याची नासाडी!

वाशीम : वाशीम जिल्ह्यात यंदा अल्प पाऊस झाल्याने पाणीटंचाईचे संकट निर्माण होण्याची दाट शक्यता असताना, जिल्हाधिकारी योगेश कुंभेजकर यांनी नागरिकांना ‘पाणी जपून वापरा’ असे आवाहन केले आहे. मात्र, दुसरीकडे रोज हजारो लिटर पाणी अक्षरशः रस्त्यावर वाहून वाया जात असल्याचे चित्र समोर आले आहे.

या पाण्यामुळं रस्यावर चिखल निर्माण होऊन नागरिक, वाहन चालक घसरून पडत आहेत. वाशीम नगर परिषदेने (पाणीपुरवठा विभाग) याकडे गांभीर्याने लक्ष द्यावे, अशी मागणी होत आहे.

जुन्या नगर परिषद पाण्याच्या टाकीजवळ, पत्रकार भवनासमोर पाण्याची पाईपलाईन फुटली असून मोठ्या प्रमाणात पाणी गळती होत आहे. संबंधित यंत्रणेचे याकडे अद्याप गांभीर्याने लक्ष गेले नसल्याने नागरिकांमध्ये संताप व्यक्त होत आहे.

एकीकडे, जिल्हाधिकारी पाणी बचतीचे आवाहन करीत आहेत, तर दुसरीकडे नगर परिषदेच्या जलवाहिनीतील गळतीमुळे पाण्याची मोठ्या प्रमाणात नासाडी होत आहे. फुटलेली पाईपलाईन तातडीने दुरुस्त करून पाण्याची नासाडी थांबवावी, अशी मागणी नागरिकांकडून होत आहे.