Nagpur Katol School Thik Karo Campaign
नागपूर : ग्रामीण भागातील शासकीय शाळांमधील मूलभूत सुविधांची प्रत्यक्ष पाहणी करण्यासाठी राबविण्यात येत असलेल्या ‘स्कूल ठीक करो’ अभियानाच्या टीमला काटोल तालुक्यातील लाडगाव येथे शाळा पाहणीदरम्यान पोलिसांनी अडविल्याचा आरोप अभियानाच्या आयोजकांनी केला आहे. पाहणी सुरू असताना पोलिसांनी टीमला थांबवून शाळेची पाहणी करण्यास विरोध केल्याचे आयोजकांचे म्हणणे आहे.
ग्रामीण विद्यार्थ्यांना उपलब्ध असलेल्या शैक्षणिक सुविधा, सुरक्षितता आणि शाळेतील मूलभूत सोयी-सुविधांची प्रत्यक्ष स्थिती जाणून घेण्यासाठी अभियानाची टीम लाडगाव येथील शासकीय शाळेत पोहोचली होती. टीमकडून पाहणी सुरू असतानाच पोलिसांनी हस्तक्षेप करून त्यांना थांबविल्याचे अभियानाच्या प्रतिनिधींनी सांगितले.
या प्रकारानंतरही टीमने संयम राखत अभियानाचा उद्देश स्पष्ट केला. ‘स्कूल ठीक करो’ अभियान कोणत्याही व्यक्ती, संस्था किंवा प्रशासनाच्या विरोधात नसून ग्रामीण विद्यार्थ्यांना उपलब्ध असलेल्या सुविधांची वस्तुनिष्ठ माहिती जाणून घेणे आणि आवश्यक सुधारणा प्रशासनाच्या निदर्शनास आणून देणे, हा या उपक्रमाचा हेतू असल्याचे आयोजकांनी स्पष्ट केले.
शाळा ही विद्यार्थ्यांच्या भविष्याची पायाभरणी करणारी संस्था असल्याने तेथील सुविधा, सुरक्षितता आणि विद्यार्थ्यांच्या हक्कांबाबत प्रश्न उपस्थित करणे ही सामाजिक जबाबदारी आहे, अशी भूमिका अभियानाच्या टीमने मांडली. प्रशासन, शाळा व्यवस्थापन आणि स्थानिक यंत्रणांचा सन्मान राखूनच प्रत्येक शाळेची पाहणी करण्याचा प्रयत्न केला जात असल्याचेही त्यांनी सांगितले.
दरम्यान, नागरिक-केंद्रित शाळा पाहणी उपक्रमांना प्रशासनाने सहकार्य करावे, तसेच ग्रामीण भागातील शासकीय शाळांची वास्तविक परिस्थिती समोर आणून आवश्यक त्या सुधारणा करण्यासाठी कार्यवाही करावी, अशी मागणी अभियानाच्या वतीने करण्यात आली आहे.
