Mahavitran power theft case
नागपूर : विजेचा अनधिकृत वापर करणे एका महिलेला चांगलेच महागात पडले आहे. नागपूरच्या जिल्हा व अतिरिक्त सत्र न्यायालयाने याप्रकरणी संबंधित महिलेला दोषी ठरवत 10 हजारांचा दंड आणि 'न्यायालय सुटेपर्यंत' कारावासाची शिक्षा सुनावली आहे. महिनाभरात सलग दुस-यांदा न्यायालयाने विजेचा अनधिकृत वापर करणा-या ग्राहकाला अशा प्रकारची शिक्षा सुनावली आहे.
तहसील पोलीस स्टेशन अंतर्गत भानखेडा, येथे राहणाऱ्या ग्राहकाच्या घरी 27 सप्टेंबर 2021 रोजी महावितरणच्या पथकाने छापा टाकला. महावितरणचे सहाय्यक अभियंता शाहरुख मेहमूद्दीन तुराक यांनी केलेल्या तपासणीत असे आढळले की, आरोपी महिलेने वीज खांबावरून अनधिकृतपणे वीज जोडणी घेतली होती. घरगुती वापरासाठी विजेची चोरी आणि मीटरमध्ये फेरफार केल्याचा ठपका ठेवत त्यांच्याविरुद्ध भारतीय विद्युत कायदा, 2003 च्या कलम 138 अन्वये गुन्हा दाखल करण्यात आला.
या प्रकरणाची सुनावणी अतिरिक्त सत्र न्यायाधीश श्री. एस. एच. ग्वालानी यांच्यासमोर झाली. सुनावणी दरम्यान आरोपी महिलेने स्वतःहून आपला गुन्हा कबूल केला. आपण घरातील एकमेव कमावती व्यक्ती असून उदरनिर्वाहासाठी छोटा घरगुती व्यवसाय चालवत असल्याचे सांगत तिने न्यायालयाकडे दयेची मागणी केली होती.
न्यायाधीशांनी आरोपीची परिस्थिती आणि तिने प्रथमच केलेला गुन्हा लक्षात घेता, तिला कारावासाऐवजी दंडात्मक शिक्षा देणे योग्य मानले. यानुसार न्यायालयाने न्यायालय सुटेपर्यंत कोठडीत बसण्याची शिक्षा सुनावली. महावितरणला नुकसान भरपाई म्हणून देण्यासाठी 10 हजार दंड आणि भविष्यात अशा गुन्ह्याची पुनरावृत्ती न करण्याची ताकीद दिली. सरकार पक्षातर्फे ॲड. काझी यांनी बाजू मांडली.
तीन आठवड्यापुर्वी जिल्हा न्यायाधीश-3 आणि अतिरिक्त सत्र न्यायाधीश एस. एच. ग्वालानी यांनी विशेष प्रकरणामध्ये अनधिकृत वीज वापर प्रकरणी ग्राहकाला दोषी ठरवून 'न्यायालयीन कामकाजाच्या समाप्तीपर्यंत तुरुंगवासाची शिक्षा आणि दहा हजार रुपये दंड ठोठावला होता.
वीज बिल थकीत असल्यामुळे महावितरणने ग्राहकाची वीज जोडणी नियमानुसार खंडित केली होती. मात्र, वीज बिल न भरता आणि कोणतीही पूर्वपरवानगी न घेता, आरोपी ग्राहकाने हे खंडित केलेली वीज जोडणी पुन्हा अवैधपणे जोडून वीज वापरण्यास सुरुवात केली. ही बाब महावितरणच्या निदर्शनास येताच, कंपनीने 2021 साली नंदनवन पोलीस स्टेशनमध्ये संबंधित ग्राहकाविरुद्ध तक्रार दाखल केली होती. जिल्हा न्यायाधीश-3 आणि अतिरिक्त सत्र न्यायाधीश एस. एच. ग्वालानी यांच्या न्यायालयाने शमशेरा बेगम शेख बब्बू यांना दोषी ठरवले. कोर्ट उठेपर्यंत तुरुंगवास तसेच10 हजार दंडाची शिक्षा सुनावली होती.
