Hemkrishna Pisde UPSC Success Story: गोंदिया जिल्ह्यातील आदिवासी भागातून आलेल्या एका तरुणाने जिद्द, चिकाटी आणि परिश्रमाच्या जोरावर देशातील सर्वात कठीण मानल्या जाणाऱ्या स्पर्धा परीक्षांपैकी एक असलेल्या नागरी सेवा परीक्षेत यश संपादन केले आहे. हेमकृष्ण पिसदे यांनी केंद्रीय लोकसेवा आयोगाच्या (UPSC) नागरी सेवा परीक्षेत ८४९ वी रँक मिळवत आपल्या कुटुंबासह संपूर्ण जिल्ह्याची मान अभिमानाने उंचावली आहे. ग्रामीण आणि आदिवासी पार्श्वभूमीतून पुढे येत मिळवलेले हे यश अनेक तरुणांसाठी प्रेरणादायी आहे.
हेमकृष्ण पिसदे यांचा प्रवास संघर्ष आणि जिद्दीचा आहे. गोंदिया जिल्ह्यातील आदिवासी परिसरात त्यांचे बालपण गेले. घरची आर्थिक परिस्थिती अत्यंत साधारण असतानाही शिक्षणाची जिद्द त्यांनी कधी सोडली नाही. मर्यादित साधनं, अडचणी आणि अनेक आव्हानांवर मात करत त्यांनी सातत्याने अभ्यास सुरू ठेवला. परिस्थिती कठीण असली तरी शिक्षणाच्या जोरावर ध्येय गाठता येतं हे त्यांनी दाखवून दिलं आहे.
उच्च शिक्षणासाठी त्यांनी पुण्यात येण्याचा निर्णय घेतला. पुण्यातील नामांकित फर्ग्युसन महाविद्यालयातून त्यांनी पदवीचे शिक्षण (BA) पूर्ण केले. कठोर परिश्रम आणि सातत्यपूर्ण अभ्यास याच्या बळावर त्यांनी या कठीण परीक्षेला सामोरे जात यश संपादन केले.
UPSC ची परीक्षा देशातील सर्वात प्रतिष्ठित आणि कठीण स्पर्धा परीक्षा मानली जाते. दरवर्षी लाखो विद्यार्थी या परीक्षेसाठी अर्ज करतात; मात्र त्यातील मोजक्याच उमेदवारांना अंतिम यश मिळते. अशा स्पर्धात्मक वातावरणात आदिवासी भागातून आलेल्या हेमकृष्ण पिसदे यांनी मिळवलेले यश विशेष आहे. त्यांच्या या यशामुळे केवळ गोंदिया जिल्हाच नव्हे तर संपूर्ण आदिवासी समाजात आनंदाचे आणि अभिमानाचे वातावरण आहे.
त्यांच्या यशाबद्दल विविध स्तरांतून त्यांचे अभिनंदन केले जात आहे. सामाजिक संस्था, शिक्षक, मित्रपरिवार आणि स्थानिक नागरिकांकडून त्यांच्यावर शुभेच्छांचा वर्षाव होत आहे. हेमकृष्ण पिसदे यांची ही यशोगाथा विशेषतः ग्रामीण आणि आदिवासी भागातील विद्यार्थ्यांसाठी प्रेरणादायी आहे.
मर्यादित साधने, कठीण परिस्थिती आणि अनेक अडथळे असतानाही चिकाटी आणि प्रामाणिक मेहनतीच्या जोरावर मोठे स्वप्न साकार करता येतात, हे त्यांनी आपल्या उदाहरणातून दाखवून दिले आहे.
शिक्षणाच्या माध्यमातून आयुष्याला नवी दिशा देता येते आणि समाजासाठी सकारात्मक काम करण्याची संधी मिळते, हा संदेश त्यांच्या यशातून मिळत असल्याची भावना अनेकांनी व्यक्त केली आहे. त्यामुळे हेमकृष्ण पिसदे यांचा संघर्षमय प्रवास अनेक तरुणांसाठी प्रेरणादायी आहे.
