गडचिरोली : राज्याचे वित्त, नियोजन, कृषी, मदत व पुनर्वसन, विधी व न्याय, कामगार राज्यमंत्री तथा जिल्ह्याचे सहपालकमंत्री ॲड.आशिष जयस्वाल यांनी आज मार्कंडा देवस्थान येथे भेट देऊन मंदिराचा जीर्णोद्धार व विकासकामांचा आढावा घेतला. यावेळी त्यांनी पुरातत्व विभागाला मंदिराच्या जीर्णोद्धाराचे काम गतीने काम पूर्ण करण्याचे निर्देश दिले.
आमदार डॉ. मिलिंद नरोटे यावेळी प्रामुख्याने उपस्थित होते. राज्यमंत्री जयस्वाल यांनी मंदिर परिसरात उपस्थित असलेल्या स्थानिक नागरिक व भाविकांशी संवाद साधून त्यांच्या भावना जाणून घेतल्या. राज्यमंत्री ॲड. जयस्वाल यांनी यावेळी मंदिरालगतच्या परिसरात प्रस्तावित असलेल्या नऊ कोटी रुपयांच्या विकासकामांना लवकरच सुरुवात करण्यात येणार असल्याची माहिती दिली.
यावेळी उपविभागीय अधिकारी रणजीत यादव, पुरातत्त्व विभागाचे शुभम कोरे, एमएसआरडीसीचे जाधव, तहसीलदार प्रशांत घोरुडे, गट विकास अधिकारी सागर पाटील तसेच महसूल व बांधकाम विभागाचे अधिकारी उपस्थित होते.
