5th Zhadipatti theatre festival
गडचिरोली : पाचव्या झाडीपट्टी नाट्य संमेलनाला देसाईगंज येथे आज (दि.४) सुरुवात झाली. राज्याचे वित्त व नियोजन राज्यमंत्री तथा गडचिरोली जिल्ह्याचे सहपालकमंत्री ॲड. आशिष जयस्वाल यांच्या हस्ते संमेलनाचे उद्घाटन झाले.
ज्येष्ठ नाट्यकलावंत प्राचार्य के. आत्माराम हे संमेलनाध्यक्ष, तर आमदार रामदास मसराम हे स्वागताध्यक्ष होते. विशेष अतिथी म्हणून सिनेअभिनेते हास्यसम्राट भारत गणेशपुरे, माजी संमेलनाध्यक्ष पद्मश्री डॉ.परशुराम खुणे, प्रा.डॉ.शेखर डोंगरे, माजी आमदार कृष्णा गजबे, नरेंद्र गडेकर तसेच सामाजिक न्याय विभागाचे सहायक आयुक्त डॉ. सचिन मडावी आदी मान्यवर उपस्थित होते.
झाडीपट्टी नाट्यकलेचे संवर्धन आणि प्रसारासाठी महाराष्ट्र शासन कटिबद्ध असून या कलेला राजाश्रय देणे ही शासनाची जबाबदारी आहे, आशिष जयस्वाल यावेळी म्हणाले. विदर्भात रामटेक येथे मुंबई आणि कोल्हापूरनंतर तिसरी चित्रपट नगरी उभी राहणार आहे. त्यामुळे झाडीपट्टीतील कलाकारांसाठी रोजगार आणि संधींचे नवे दार खुले होईल, असेही त्यांनी सांगितले.
संमेलनाध्यक्ष प्राचार्य के.आत्माराम म्हणाले की, रंगमंचावर सगळे समान असतात. नायक असो वा पार्श्वभूमीतील कलाकार, प्रत्येक भूमिकेला महत्त्व असते. प्रेक्षकांच्या मनावर जेव्हा सामूहिक परिणाम घडतो तेव्हाच नाटक यशस्वी ठरते. सहकार हा नाट्यकलेचा श्वास आहे. रंगभूमीशी प्रामाणिकपणा, संवेदनशीलता आणि समर्पण हीच खरी कलाकाराची ओळख आहे. अभिनयापुरतीच नव्हे, तर जगण्यातही कलावंताची वृत्ती जोपासा. खरा कलावंत तोच जो आयुष्यालाही एक सुंदर नाटक मानतो, असे के.आत्माराम म्हणाले. झाडीपट्टी रंगभूमीला राजाश्रय देऊन प्रत्येक तालुक्यात एक नाट्यगृह उभारण्यात यावे, तसेच कलावंतांसाठी विमा व मानधन योजना सुरू करण्यात याव्यात, अशी मागणी त्यांनी शासनाकडे केली.
सिनेअभिनेते भारत गणेशपुरे यांनी झाडीपट्टी ही सक्षम रंगभूमी असल्याचे सांगून या कलेची परंपरा कायम ठेवण्यासाठी सर्वांनी मिळून एकत्रित प्रयत्न करणे गरजेचे असल्याचे सांगितले.
आमदार रामदास मसराम यांनी झाडीपट्टी कलावंतांना मानधन देण्याची आणि नाट्यगृह उभारणीची मागणी केली. माजी आमदार कृष्णा गजबे यांनी वडसा येथे नाट्यगृहासाठी 10 कोटी रुपयांचा निधी मंजूर करण्याची विनंती शासनाकडे केली.
संमेलनाचे प्रास्ताविक डॉ. अनिरुद्ध बनकर यांनी केले. त्यांनी झाडीपट्टी नाट्यकलेच्या विकासासाठी शासनाकडे आरोग्य विमा, मानधन व नाट्यगृह यांसारख्या मागण्या मांडल्या. संमेलनाचे आयोजन जिल्हा प्रशासन व झाडीपट्टी नाट्यसंमेलन समितीने केले असून यात नाट्यप्रेमींनी मोठ्या उत्साहात सहभाग घेतला. कार्यक्रमाला नाट्य कलावंत व प्रेक्षक नागरिक मोठ्या संख्येने उपस्थित होते.
