चंद्रपूर : शहरातील जटपुरा गेट परिसरातील पतंजली मेगा स्टोअरवर अन्न व औषध प्रशासन (FDA) विभागाने धडक कारवाई करत 45 हजार 970 रुपयांचा औषधसाठा जप्त केला. तपासणीदरम्यान काही औषधांच्या पॅकेजिंगवर मोटापा, दमा, हृदयविकार आणि ताप यांसारख्या आजारांवर निश्चित उपचार होण्याचे दावे करण्यात आल्याचे आढळून आले. हे दावे कायद्याने प्रतिबंधित असल्याने विभागाने ही कारवाई केली.
चंद्रपूर येथील अन्न व औषध प्रशासनाच्या पथकाने पतंजली मेगा स्टोअरमध्ये अचानक तपासणी केली. यावेळी विक्रीसाठी ठेवण्यात आलेल्या काही औषधांच्या वेष्टनांवर विविध गंभीर आजारांवर हमखास उपचार होण्याचे दावे नमूद असल्याचे निदर्शनास आले.
FDA अधिकाऱ्यांनी दिलेल्या माहितीनुसार, औषधे आणि जादुई उपचार (आक्षेपार्ह जाहिराती) अधिनियम, 1954 अंतर्गत अशा प्रकारच्या जाहिराती व दावे करण्यास मनाई आहे. या प्रकारच्या दाव्यांमुळे ग्राहकांची दिशाभूल होण्याची शक्यता असून आरोग्यावरही विपरीत परिणाम होऊ शकतो.
तपासणीदरम्यान आढळलेल्या अनियमितता गंभीर स्वरूपाच्या असल्याने विभागाने तत्काळ 45 हजार 970 रुपये किमतीचा औषधसाठा जप्त केला. या प्रकरणात संबंधितांवर पुढील कायदेशीर कारवाईची प्रक्रिया सुरू असल्याची माहिती FDA प्रशासनाने दिली.
या कारवाईमुळे औषधांच्या जाहिराती आणि विक्रीसंदर्भातील नियमांचे पालन करण्याबाबत व्यापारी व औषध विक्रेत्यांना स्पष्ट इशारा मिळाल्याचे मानले जात आहे. FDA विभागाकडून अशा प्रकारच्या तपासण्या भविष्यातही सुरू राहणार असल्याचे संकेत मिळत आहेत.
