चंद्रपूर : पोलीस असल्याचे भासवून नागरिकांकडून खंडणी वसूल करणाऱ्या बनावट टोळीचा पर्दाफाश करत मूल पोलिसांनी तीन खंडणीखोरांना अटक केली आहे. या आरोपींनी पोलिस असल्याची बतावणी करून नागरिकांना धमकावून पैसे उकळले होते. पोलिसांनी या आरोपींकडून एकूण १३ लाख १० हजार रुपयांचा मुद्देमाल जप्त केला असून चौथ्या आरोपी फरार झाला असून त्याचा शोध सुरू आहे.
दिनांक ३ जुलै २०२५ रोजी फिर्यादी सुरेश लक्ष्मण गणमेनवार (वय ३६, रा. चिरोली) यांच्या घरी एक पांढऱ्या रंगाची अर्टीका कार (क्रमांक MH34-CJ-5824) येऊन त्यामधील चार जणांनी स्वतःला पोलीस भरारी पथक, चंद्रपूर येथील अधिकारी असल्याचे भासवले. विनापरवाना दारु साठा असल्याच्या कारणावरून कारवाईची धमकी देत त्यांनी फिर्यादीकडून तडजोडीअंती १०,००० रुपये खंडणी उकळली.
त्यानंतर याच टोळीने मौजा डोंगरगाव येथील एजाज शेख यांच्या अंडा-आमलेट दुकानात जाऊन ग्राहक दारू पित असल्याचा बनाव करत कारवाईची धमकी दिली. या वेळीही तडजोड करत ५,०००रुपये खंडणी उकळण्यात आली. या प्रकरणावरून दिनांक १३ जुलै २०२५ रोजी मुल पोलीस स्टेशनला गुन्हा नोंदवण्यात आला. तपासात मुल पोलिसांनी आरोपी क्र. (१) बादल दुर्गाप्रसाद दुबे (वय ३६), (२) संगिता बादल दुबे (वय २७) - दोघे रा. रेंगेपार, ता. साकोली, जि. भंडारा, (३) अजय विजय उईके (वय ३१), रा. गजानन मंदिर रोड, शितला माता मंदिर मागे, चंद्रपूर या तिघांना अटक केली आहे. चौथा आरोपी देवेंद्र चरणदास सोनवणे (वय ३०) रा. निलज, ता. साकोली, जि. भंडारा – ह.मु. भिवापूर वार्ड, चंद्रपूर – सध्या फरार असून त्याचा शोध सुरू आहे.
पोलिसांनी या आरोपींकडून एक पांढऱ्या रंगाची अर्टीका कार (किंमत: ₹१२,५०,०००),दोन मोबाईल फोन (किंमत: ₹४५,०००) आणि रोख रक्कम १५,००० रुपये असा १३,१०,००० रुपयांचा मुद्देमाल जप्त केला आहे. सदर कारवाई पोलीस अधीक्षक मुम्मका सुदर्शन, अपर पोलीस अधीक्षक ईश्वर कातकडे, प्रभारी उपविभागीय पोलीस अधिकारी सुधाकर यादव यांच्या मार्गदर्शनात करण्यात आली.
पोलीस निरीक्षक विजय राठोड यांच्या नेतृत्वाखाली सपोनि सुबोध वंजारी, पोहवा जमीर खान पठाण, पोहवा भोजराज मुंडरे, नापोअं चिमाजी देवकते, पोअं नरेश कोडापे, पोअं शंकर बोरसरे, पोअं संदीप चुधरी यांनी ही कारवाई केली.
कोणीही पोलिस असल्याची बतावणी करून खंडणी मागत असल्यास अशा बनावट व्यक्तींच्या धमकीला बळी पडू नका. तात्काळ जवळच्या पोलीस स्टेशनमध्ये किंवा पोलीस नियंत्रण कक्ष, चंद्रपूर – ११२ वर संपर्क साधावा असे आवाहन पोलिसांनी केले आहे.
