Chandrapur Pink Vehicle Damini Pathak
चंद्रपूर : महिला, तरुणी आणि बालकांच्या सुरक्षेला अधिक बळकटी देण्यासाठी चंद्रपूर पोलीस दलाने दामिनी पथकासाठी विशेष 'पिंक वाहन' सेवेत दाखल केले आहे. पोलीस अधीक्षक कार्यालयाच्या प्रांगणात वरिष्ठ पोलीस अधिकाऱ्यांच्या उपस्थितीत या वाहनाचा शुभारंभ करण्यात आला. या उपक्रमामुळे महिला सुरक्षेसाठी तातडीने प्रतिसाद देणे आणि संवेदनशील भागांमध्ये नियमित गस्त घालणे अधिक प्रभावी होणार आहे.
महिलांच्या सुरक्षेसाठी कार्यरत असलेल्या दामिनी पथकाला अत्याधुनिक सुविधांनी सुसज्ज 'पिंक वाहन' उपलब्ध करून देण्यात आले आहे. कोणत्याही प्रकारची छेडछाड, अत्याचार किंवा आपत्कालीन परिस्थिती उद्भवल्यास हे पथक तात्काळ घटनास्थळी पोहोचून आवश्यक मदत व कायदेशीर कारवाई करणार आहे.
या वाहनाच्या माध्यमातून चंद्रपूर शहरासह जिल्ह्यातील शाळा, महाविद्यालये, बसस्थानके, रेल्वे स्थानके, प्रमुख बाजारपेठा तसेच निर्जन व संवेदनशील भागांमध्ये नियमित गस्त घालण्यात येणार आहे. त्यामुळे महिला व मुलींच्या सुरक्षेला बळ मिळण्याबरोबरच समाजकंटकांवरही प्रभावी प्रतिबंध निर्माण होण्यास मदत होईल.
'पिंक वाहनाला आकर्षक गुलाबी-जांभळा रंग देण्यात आला असून त्यावर 'दामिनी मोबाईल' असा विशेष लोगो लावण्यात आला आहे. त्यामुळे गर्दीच्या ठिकाणी हे वाहन सहज ओळखता येणार असून, त्याची ठळक उपस्थिती कायदा व सुव्यवस्था राखण्यासाठीही उपयुक्त ठरणार आहे.
या वाहनात प्रशिक्षित महिला पोलीस कर्मचारी तैनात राहणार आहेत. त्यामुळे पीडित महिला किंवा मुलींना कोणत्याही प्रकारचा संकोच न बाळगता आपली तक्रार मांडता येईल. संवेदनशीलतेने संवाद साधून त्यांना आवश्यक ती मदत व संरक्षण देण्यावर दामिनी पथकाचा भर राहणार आहे.
यावेळी पोलीस अधीक्षकांनी सांगितले की, "महिला आणि मुलींची सुरक्षितता ही चंद्रपूर पोलीस दलाची सर्वोच्च प्राथमिकता आहे. दामिनी पथकाला उपलब्ध झालेल्या या 'पिंक वाहनामुळे' प्रतिसादाची गती वाढेल. कोणत्याही प्रकारची छेडछाड, त्रास किंवा आपत्कालीन प्रसंग उद्भवल्यास महिलांनी तात्काळ पोलीस हेल्पलाइन किंवा दामिनी पथकाशी संपर्क साधावा."
चंद्रपूर पोलीस दलाने महिलांना कोणत्याही संकटाच्या वेळी दामिनी पथक हेल्पलाइन क्रमांक ७४४१०९८१२२ वर संपर्क साधण्याचे आवाहन केले आहे. महिला सुरक्षेसाठी राबविण्यात आलेला हा उपक्रम सुरक्षिततेची भावना अधिक दृढ करण्यासोबतच महिला सक्षमीकरणाच्या दिशेने महत्त्वाचे पाऊल मानले जात आहे.
