गणेशोत्सवानिमित्त शहर व जिल्ह्यातील वाहतुकीत बदल करण्यात आला आहे. जिल्हाधिकारी अजित कुंभार यांनी तसा आदेश जारी केला.आदेशाप्रमाणे, दि. 17 सप्टेंबर रोजी अकोला शहरातील श्री गणेश विसर्जन मिरवणूक मार्गावरील वाहतूक सकाळी 6 वा. पासून दुस-या दिवशी स. 6 पर्यंत, अकोला- अकोट राज्य मार्गावरील वाहतूक सकाळी 6 पासून दुस-या दिवशी दु. 12 पर्यंत आणि अकोला- पारस फाटा ते बाळापूर मार्गावरील वाहतूक सकाळी 6 पासून दुस-या दिवशी दु. 12 पर्यंत वळविण्यात येईल.
डाबकी रस्ता, जुन्या शहराकडून विठ्ठल मंदिर, कोतवाली चौक मार्गे बसस्थानकाकडे येणारी आणि डाबकी रस्त्याकडून भीमनगर, मामा बेकरीकडे येणारी वाहतूक या कालावधीत भांडपुरा चौक- पोळा चौक- हरिहरपेठ- वाशिम बायपास चौक- हायवेवरून लक्झरी बसस्थानक ते अशोक वाटिका व अकोला बसस्थानकाकडे वळविण्यात येईल. अकोला बसस्थानकाकडून हरिहरपेठेकडे जाण्यासाठी अशोक वाटिका- लक्झरी बसस्थानक- वाशिम बायपास असा मार्ग असेल. रेल्वे ओव्हर ब्रिजकडून कोतवाली चौकातून लक्झरी बसस्थानकाकडे जाणारी वाहतूक रेल्वे स्थानक चौकाकडून अग्रसेन चौकातून उड्डाण पुलावरून जेल चौक व लक्झरी बसस्थानकाकडे वळविण्यात येईल. लक्झरी बसस्थानकाकडून अकोट स्टॅंडकडे जाण्यासाठी जेल चौक- उड्डाण पुलावरून जावे लागेल. सुभाष चौकाकडून गांधी चौकाकडे जाण्यासाठी दामले चौकाकडून टॉवर चौक व अंडरपासमधून जावे लागेल.
अकोट ते अकोला मार्गावरील वाहतूक अकोला बसस्थानकापासन अशोक वाटिकेवरून वाशिम बायपास- शेगाव टी पॉईंट- गायगाव- देवरी अशी वळविण्यात येईल. अकोल्यावरून म्हैसांग, दर्यापूरकडे जाणारी वाहतूक टॉवर चौकातून रेल्वेस्थानक- सातव चौक मार्गे न्यू तापडियानगर, खरप टी पॉईंटवरून म्हैसांग अशी वळविण्यात येईल.
अकोल्याहून पारस फाटा- बाळापूरकडे जाणारी वाहतूक हायवे ट्रॅप कार्यालयाकडून वळविण्यात येईल. खामगावकडून पारस फाटा- बाळापूर- पातूरकडे जाणारी वाहतूक खामगाव- पारस फाटा- वाशिम बायपास चौक- पातूर याचमार्गे वळविण्यात येईल. अकोला- पारस फाटा मार्गे खामगावकडे जाणारी वाहतूक अकोला- पारस फाट्याजवळील रोशन ढाब्याजवळून वळवून खामगाव ते अकोला मार्गावरील तपे हनुमान मंदिराजवळील डिव्हायडर बॅरिकेटिंगपर्यंत वळविण्यात येईल. या बदलानुसार नागरिकांनी पर्यायी मार्गाचा वापर करण्याचे आवाहन करण्यात आले आहे.
