गोंदिया: ८ हजारांची लाच घेताना पोलीस उपनिरीक्षक ‘एसीबी’च्या जाळ्यात

गोंदिया, पुढारी वृत्तसेवा : ट्रॅक्टर चालकावर गुन्हा नोंद न करण्याकरिता १० हजार रुपयांची लाच मागणाऱ्या सहाय्यक पोलीस उपनिरीक्षकाला तडजोडी अंती ८ हजार रुपयाची लाच स्वीकारताना गोंदिया लाच लुचपत प्रतिबंधक विभागाच्या पथकाने आज (दि. २६) रंगेहाथ पकडले. अनिल फागुजी पारधी (वय ५४, रा. श्रीनगर, गोंदिया) असे लाचखोर सहाय्यक पोलीस उपनिरीक्षकाचे नाव आहे

याबाबत अधिक माहिती अशी की, तक्रारदार हे ट्रॅक्टर चालक असून त्यांच्या विरुद्ध गोंदिया शहर पोलीस ठाण्यात तोंडी तक्रार करण्यात आली होती. दरम्यान गुन्हा दाखल न करण्याकरीता व तक्रारदार व गैरअर्जदार यांच्यात समझोता करून देण्याच्या मोबदल्यात आरोपी सहाय्यक पोलीस उपनिरीक्षक यांनी तक्रारदार यांच्याकडे १० हजार रुपयांची लाच मागितली. मात्र, त्यांना लाच द्यायची नसल्याने त्यांनी २४ मे रोजी लाच लुचपत प्रतिबंधक विभाग गोंदिया येथे तक्रार दाखल केली. यावर पडताळणीदरम्यान आरोपी अनिल पारधी याने १० हजार रुपये लाच रकमेची मागणी करून लाच स्वीकारण्याची तयारी दर्शविली.