पुढारी ऑनलाईन डेस्क : मुख्यमंत्री उद्धव ठाकरे यांनी हनुमान चालीसा पठण न केल्यास मातोश्री समोर हनुमान चालिसा वाजवणार असल्याचा इशारा आमदार रवी राणा यांनी दिला होता. मात्र, युवा सेनेने सडेतोड उत्तर देत शुक्रवारी १५ एप्रिल रोजी रात्रीच आमदार राणांच्या शंकर नगर स्थित गंगासावित्री निवास स्थानासमोर हनुमान चालिसा वाजवला.
दुसरीकडे आमदार रवी राणा व खासदार नवनीत राणा यांनी शनिवारी १६ एप्रिल रोजी अकोली मार्गावरील पगडीवाले हनुमान मंदिरात हनुमान चालिसाचे पठण करीत 100 मंदिरात भोंगे वाटप केले. घरासमोर धिंगाणा घालणारे भगोडे होते, शिवाय छातीठोक पणे मातोश्रीवर जाणार असल्याचे आमदार राणा म्हणाले होते. आता त्यांनी हनुमान चालीसा पठणाचा मुहूर्त निश्चित केला आहे.
आमदार रवी राणा व खासदार नवनीत राणा २२ एप्रिलला मातोश्रीसमोर हनुमान चालीसा पठण करणार आहेत. कार्यकर्त्यांसह ते मुंबईत दाखल होणार आहेत. मुंबईच्या महापौर किशोरी पेडणेकर यांनी येऊन दाखवाच असे प्रतिआव्हान यापूर्वीच दिलं आहे, त्यामुळे शुक्रवारी होणार, तरी काय याची उत्सुकता आहे.
मनसे प्रमुख राज ठाकरे यांनी मस्जिदीवरील भोंगे काढा अन्यथा भोंगे लावत हनुमान चालिसा वाचणार असल्याचा इशारा दिला होता. या पार्श्वभूमीवर हनुमान चालिसावरून राजकारण तापल्याचे दिसून येत आहे.
