ठाणे: जुन्या पैशांच्या देवाण-घेवाणीच्या वादातून ठाणे रेल्वे स्थानक परिसरात झालेल्या हल्ल्यात विशाल पटेकर (वय अंदाजे 18-20) या तरुणाचा मृत्यू झाला, तर 16 वर्षीय अनमोल गंभीर जखमी झाला. या प्रकरणी ठाणे लोहमार्ग पोलिसांनी गुन्हा दाखल करून अल्पवयीन आरोपीला ताब्यात घेतले आहे. वरिष्ठ पोलिस निरीक्षक अर्चना दुसाने यांनी याबाबत माहिती दिली.
मिळालेल्या माहितीनुसार, तक्रारदार अनमोल हा आपल्या मित्र विशाल पटेकर, मयुरेश जाधव आणि इतर मित्रांसह 5 मे रोजी रात्री ठाणे रेल्वे स्थानकात आला होता. त्यांचा एक मित्र उत्तर प्रदेशला जाणार असल्याने त्याला सीएसएमटीकडे जाणाऱ्या लोकलमध्ये बसवण्यासाठी सर्वजण स्थानकात आले होते.
यानंतर ते फलाट क्रमांक 2 कडे जात असताना त्यांना त्यांचा ओळखीचा राघव(अल्पवयीन नाव बदलेले) भेटला. रेल्वे ट्रॅकजवळ उभे राहून गप्पा मारत असताना जुन्या पैशांच्या देवाण-घेवाणीचा वाद पुन्हा उफाळून आला. वाद वाढताच राघवने संतापाच्या भरात अनमोलची कॉलर पकडून धारदार शस्त्राने त्याच्यावर हल्ला केला.
या हल्ल्यात अनमोलच्या ओठाला गंभीर दुखापत झाली. दरम्यान, मित्राला वाचवण्यासाठी मध्ये पडलेल्या विशाल पटेकरवरही आरोपीने वार केले. या हल्ल्यात विशाल गंभीर जखमी झाला. जखमी विशालला तातडीने ठाणे जिल्हा शासकीय रुग्णालयात दाखल करण्यात आले. मात्र उपचारादरम्यान डॉक्टरांनी त्याला मृत घोषित केले.
