मीरा रोड :भाईंदर पूर्वेच्या नवघर रोड परिसरात रविवारी सकाळी एका व्यक्तीचा मृतदेह संशयास्पद स्थितीत आढळून आल्याने खळबळ उडाली आहे. मयत व्यक्तीचे नाव इंद्रजित यादव (वय 58) रा. विकास उद्योग नगर, भाईंदर असे असून खिडकीच्या लोखंडी ग्रीलमध्ये मान अडकलेल्या अवस्थेत हा मृतदेह सापडल्याने, हा घातपात आहे की विचित्र अपघात, याबाबत परिसरात उलटसुलट चर्चा सुरू आहेत.
मिळालेल्या माहितीनुसार, नवघर रोडवरील क्लासिक स्टील इंडस्ट्रीमध्ये रविवारी सकाळी ही धक्कादायक घटना उघडकीस आली. मृत व्यक्तीचे शरीर विचित्र स्थितीत होते. त्यांचे अर्धे शरीर खिडकीच्या आत तर अर्धे खिडकीच्या बाहेर लटकलेले होते. हे दृश्य पाहून परिसरात भीतीचे वातावरण पसरले. घटनेची माहिती मिळताच मीरा रोड पोलीस ठाण्याचे अधिकारी आणि कर्मचाऱ्यांनी घटनास्थळी धाव घेतली.
पोलिसांनी तातडीने मृतदेह ताब्यात घेऊन पंचनामा केला. प्राथमिक तपासासाठी फॉरेन्सिक टीमचीही मदत घेतली जात आहे. पोलिसांनी व्यक्त केलेल्या प्राथमिक अंदाजानुसार, हा दुर्दैवी अपघात असण्याची शक्यता आहे. संबंधित व्यक्तीचा मोबाईल खिडकीबाहेर पडला होता. तो उचलण्यासाठी खिडकीतून वाकले असताना त्यांचा तोल गेला असावा व मान ग्रीलमध्ये अडकली असावी. ग्रीलमध्ये मान घट्ट अडकल्याने श्वास गुदमरून त्यांचा मृत्यू झाला असावा, असा प्राथमिक अंदाज वर्तवण्यात आला आहे.
मृत्यूचे नेमके कारण अद्याप स्पष्ट झालेले नाही. शवविच्छेदन अहवालानंतरच हा अपघात होता की घातपात, हे स्पष्ट होईल असे पोलिसांकडून सांगण्यात आले आहे. औद्योगिक वसाहतीत अशा प्रकारे मृतदेह सापडल्याने कामगारांमध्ये आणि स्थानिक नागरिकांमध्ये भीतीचे वातावरण आहे. पोलीस सध्या सीसीटीव्ही फुटेज व प्रत्यक्षदर्शींची चौकशी करत असून, या गूढ मृत्यूचा उलगडा करण्याचे आव्हान पोलिसांसमोर आहे.
