मिरा रोड : काशिमिरा पोलीस ठाणे हद्दीत एका बावीस वर्षीय नराधमाने 13 वर्षीय अल्पवयीन मुलीला तिच्या घरातून जबरदस्तीने अपहरण करून तिच्या इच्छे विरोधात शारीरिक संबंध केले. तसेच ती पीडिता त्या नराधमास विरोध करत असताना, त्याने त्या अल्पवयीन पीडितेस जीवे ठार मारण्याची धमकी दिली. याप्रकरणी काशिमिरा पोलीस ठाण्यात अपहरण करून बलात्कार सह पोक्सो कायद्याअंतर्गत गुन्हा दाखल करण्यात आला आहे. तसेच पोलिसांनी तपास करून आरोपीला अटक केली आहे.
काशिमिरा परिसरात एक धक्कादायक व घृणास्पद घटना घडली आहे. मंगळवारी दुपारी 1 ते 2 च्या सुमारास त्यांच्याच बाजूला राहणाऱ्या एका 22 ते 23 वर्षीय नराधमाने 13 वर्षाच्या अल्पवयीन मुलीचे अपहरण करून तिचे तोंड दाबून जबरदस्तीने बलात्कार केल्याप्रकरणी पीडितेच्या वडिलांच्या फिर्यादीवरून अपहरण, बलात्कार सह पोक्सोचा गुन्हा दाखल करण्यात आला आहे.
या घटनेची माहिती मिळताच तात्काळ मिरा रोड विभागाचे सहाय्यक पोलीस आयुक्त गणपत पिंगळे, वरिष्ठ पोलीस निरीक्षक राजेंद्र कांबळे व महिला पोलीस निरीक्षक शितल मुंढे यांनी घटनास्थळी भेट देत तात्काळ त्या आरोपीला अटक करण्याचे आदेश दिले. काशीमिरा पोलिसांनी आरोपीचा तपास करून त्याच दिवशी रात्री दहा वाजता अटक केली आहे. या गुन्ह्याचा तपास पोलीस उपनिरीक्षक स्वप्नील बेलोसे हे करत आहेत.
