कल्याण: कल्याणमधील उच्चभ्रू वायलेनगर परिसरात एका कारचालकाने महिलांसमोर भररस्त्यात उघड्यावर लघुशंका केल्याचा संतापजनक प्रकार समोर आला आहे. या घटनेमुळे परिसरात तीव्र संताप व्यक्त केला जात असून संबंधितावर तातडीने कठोर कारवाई करण्याची मागणी होत आहे.
मिळालेल्या माहितीनुसार, सकाळी साडेदहाच्या सुमारास एक प्रवासी कार परिसरातील दुकानासमोर येऊन थांबली. त्या ठिकाणी महिला उपस्थित होत्या. चालकाने आधी जवळील दुकानातून पाण्याची बाटली घेतली आणि त्यानंतर कोणतीही पर्वा न करता कारसमोरच उघड्यावर लघुशंका करण्यास सुरुवात केली.
या घृणास्पद प्रकारामुळे परिसरातील महिला संतापल्या. दुकानातील महिलांनी आणि स्थानिक नागरिकांनी चालकाला जाब विचारला असता त्याने उलट महिलांनाच शिवीगाळ केल्याचे सांगण्यात येत आहे. त्यानंतर तो वाहन घेऊन घटनास्थळावरून पसार झाला.
दरम्यान, शिवसेना उद्धव बाळासाहेब ठाकरे पक्षाचे पदाधिकारी राजेश लोंढे यांनी संबंधित वाहनाचा क्रमांक आणि छायाचित्र वाहतूक विभागाकडे पाठवले असून खडकपाडा पोलीस ठाण्यात तक्रार दाखल करण्यात आल्याची माहिती दिली.
