ठाणे : मुंब्रा परिसरातील अंमली पदार्थ तस्करांचे कंबरडे मोडणाऱ्या तत्कालीन मुंब्रा पोलीस ठाण्याचे वपोनि अनिल शिंदे यांनी गुन्हे शाखा युनिट-१ पथकात नियुक्ती झाल्यानंतर ४ किलो 'हायड्रा गांजा' विक्री करण्यासाठी आलेल्या दोघांना अटक करून पुन्हा कारवाईचा धडाका सुरु केल्याचे चित्र आहे.
पोलीस पथकाने गणेश रामचंद्र मालुसरे (३७) व दर्शन सुनील जाधव (२१) याना अटक करून २ लाख २७ हजार ९०० किमतीचा ४.५३८ किलो 'हायड्रा गांजा' हस्तगत करण्यात आला. दोघांच्या विरोधात कोपरी पोलिस ठाण्यात एनडीपीएस अन्वये गुन्हा दाखल केला आहे.
ठाणे गुन्हे शाखा घटक-१ चे पोलिस निरीक्षक अमोल वालझाडे यांना मिळालेल्या गोपनीय माहितीच्या आधारे वरिष्ठ पोलिस निरीक्षक अनिल शिंदे यांच्या मार्गदर्शनाखाली १४ जुलै रोजी रात्री साडेनऊच्या सुमारास गांधीनगर येथील स्वर्गीय सुरेश जाधव गार्डनसमोरील मैदान परिसरात सापळा रचण्यात आला. या कारवाईत गणेश रामचंद्र मालुसरे (३७) व दर्शन सुनील जाधव (२१) या दोघांना ताब्यात घेण्यात आले.
