डोंबिवलीः बँकेला २४ कोटींचा चुना लावण्याचा प्रयन्त
डोंबिवली : पुढारी वृत्तसेवा
एका कंपनीच्या नावाने बोगस चेक तयार करून नामांकीत बँकेच्या डोंबिवली शाखेला 24 कोटींचा चुना लावण्याचा प्रयत्न उघडकीस आला आहे. या प्रकरणी मानपाडा पोलिसांनी अशा बोगस चेकद्वारे खातेधारकांचे पैसे उडवणाऱ्या टोळीतील आतापर्यंत 7 बदमाश्यांना गजाआड करण्यात आले आहे.
या टोळीतील सचिन प्रकाश साळस्कर (29, रा. विरार), उमर फारूक (39, रा. विरार), अनेक अनिल ओतारी (33, रा. विरार), मजहर मोहम्मद हुसेन खान (40, रा. विरार), हरिश्चंद्र काशिनाथ कडव (रा. वांगणी), नितीन दिलीप शेलार (40, रा. वांगणी) आणि अशोक बिहारीराम चौधरी (51, रा. महेश अपार्टमेंट, गोग्रासवाडी, नामदेव पथ, डोंबिवली-पूर्व) अशी या सात जणांना ताब्यात घेण्यात आले आहे.
यातील सचिन साळस्कर, उमर फारूक आणि अनेक ओतारी या तिघांना कल्याण कोर्टाने 6 फेब्रुवारीपर्यंत पोलिस कोठडी सुनावली आहे. तर उर्वरित चौघांची पोलिस कोठडी संपल्यानंतर त्यांची रवानगी कल्याणच्या आधारवाडी कारागृहात करण्यात आली आहे. या संदर्भात एचडीएफसीच्या कल्याण-शिळ मार्गावर असलेल्या दावडीतील शाखेचे मॅनेजर विशाल रामप्रसाद व्यास (४५) यांच्या तक्रारीवरून मानपाडा पोलिसांनी गुन्हा दाखल केला होता.
या ७ जणांच्या टोळीने इंडस टॉवर प्रा. लि. नामक कंपनीच्या मालकीचा २४ कोटी रुपयांची रक्कम नमूद असलेला बोगस चेक तयार केला. हा चेक १ ऑक्टोबर २०२१ रोजी एचडीएफसी बँकेच्या दावडी शाखेत सादर केला. विशेष म्हणजे त्या चेकवर असणाऱ्या सह्या देखील तंतोतंत जुळत होत्या. मात्र चेकची प्रिंट वेगळ्या शाईत असल्याचे बँक अधिकाऱ्यांच्या निदर्शनास आले. त्यामुळे ब्रँच मॅनेजर विशाल व्यास यांना हा प्रकार संशयास्पद वाटला. त्यांनी या चेकवर संशोधन केले असता हा चेक पूर्ण बोगस असल्याचे स्पष्ट झाले. त्यानंतर त्यांनी पोलिसांकडे धाव घेऊन कागदोपत्री पुराव्यांसह फिर्यादी दाखल केली. पोलिसांनी चौकस तपास करून आतापर्यंत एकूण ७ आरोपींना अटक केली आहे.
वरिष्ठ पोलिस निरिक्षक शेखर बागडे यांच्या मार्गदर्शनाखाली सपोनि श्रीकृष्ण गोरे, विरार पोलिस ठाण्याचे जमादार सुरेंद्र शिवदे, दिपक जगदाळे यांनी या प्रकरणाचा तपास केला.
आरोपी टीम वर्कने काम करतात. यात खातेधारकांचे बँक डिटेल्स गोळा करणे, त्यावर असणारा बॅलन्स, खातेधारकाच्या सहीचे फोटो, वगैरे माहिती घेत असत. त्यानंतर त्या माहितीच्या आधारे बोगस चेक बनवण्याचे काम करत असत. असे तपासातून उघड झाले आहे. एक साधा चेक घेऊन त्यावरील खातानंबर खोडून, नवीन खातानंबर प्रिंट केला जाई. जमविलेल्या माहितीच्या आधारे मग त्यावर बनावट सही केली जात असे. त्यानंतर हा चेक वापरून अकाऊंट टू अकाऊंट पैसे पाठविले जात असत. पैसे ट्रान्सफर करून घेण्यासाठी देखील डमी अकाऊंटचाच वापर केला जात असे. अशाप्रकारे आतापर्यंत या आरोपींनी ५० पेक्षा जास्त बोगस चेक बनविल्याचे तपासात निष्पन्न झाले आहे.
हेही वाचलतं का?