डोंबिवली : कल्याण संतोषनगर येथील तरुणीला अर्धवेळ नोकरीचे अमिष दाखवून चार जणांनी ऑनलाईन प्रकारे तब्बल 10 लाख 51 हजारांचा गंडा घातला आहे. या तरूणीला ऑनलाईन माध्यमातून संशयित आरोपींनी दिलेल्या प्रक्रिया पूर्ण कराव्या लागल्या. या प्रक्रिया करताना संशयित आरोपींनी तरूणीकडून 10 लाख 51 हजार रूपये परत देण्याच्या बोलीवर उकळले. त्यानंतर उकळलेली रक्कम परत न करता तरुणीची फसवणूक केली. सप्टेंबर ते नोव्हेंबर 2023 या कालावधीत हा फसवणुकीचा प्रकार घडला आहे. प्रिशा, दिशा, आदिती आणि नारायण पटेल अशी फसवणूक करणाऱ्या भामट्यांची नावे आहेत. या संदर्भात कोळसेवाडी पोलिस ठाण्यात फसगत झालेल्या तरूणीने तरूणीने तक्रार दाखल केली आहे.
या संदर्भात पोलिसांकडून मिळालेल्या माहितीनुसार, मागील वर्षी सप्टेंबरमध्ये आरोपींनी तक्रारदार तरूणीला टेलिग्रामद्वारे संपर्क साधला. तुम्हाला अर्धवेळ नोकरी देण्यास आम्ही इच्छूक आहोत, असे सांगितले. या कामासाठी तुम्हाला अन्य व्यक्ति संपर्क करतील. त्याप्रमाणे तुम्ही पुढील प्रक्रिया पार पाडा असे सांगितले. नियमित नोकरीसह अर्धवेळ नोकरी मिळणार असल्याने तरुणीने भामट्यांनी सांगितल्याप्रमाणे पुढील प्रक्रिया पार पाडण्यास सुरूवात केली. हवाई जहाज नोंदणीचे काम फक्त तुम्हाला करायचे आहे. यासाठी पहिले तुम्हाला काही टास्क दिले जातील ते तुम्ही पूर्ण करायचे आहेत. हे टास्क आणि नोंदणी पूर्ण झाल्यानंतर तुम्ही जी काही रक्कम भरणा करणार आहेत. ती तुम्हाला वाढीव रकमेसह परत मिळेल, असे अमिष भामट्यांनी तरुणीला दाखवले.
या तरुणीचा विश्वास संपादन करून आरोपींनी तरुणीकडून 10 लाख 51 हजार रूपये टप्प्याने उकळले. नोंदणीच्या सर्व प्रक्रिया पूर्ण केल्यानंतर तरुणीने अर्धवेळ नोकरी आणि भरणा केलेली रक्कम वाढीव रकमेसह परत देण्याची मागणी आरोपींकडे केली. वर्षभर ते भामटे तरूणीला विविध कारणे देऊन रक्कम देण्यास टाळाटाळ करत होते. वर्षभराच्या प्रतीक्षेनंतर आरोपी आपणास रक्कम परत करत नाहीत आणि अर्धवेळ नोकरीही देत नाहीत, त्यामुळे त्यांनी आपली फसवणूक केल्याची खात्री पटल्यानंतर तरूणीने कोळसेवाडी पोलिस ठाण्यात धाव घेऊन तक्रार दाखल केली. पोलिसांनी माहिती तंत्रज्ञान कायद्याने गुन्हा दाखल केला आहे. सहाय्यक पोलिस निरीक्षक डी. एस. पाटील आणि त्यांचे सहकारी या संदर्भात अधिक तपास करत आहेत.
