टाकळी सिकंदर; पुढारी वृत्तसेवा : टाकळी सिकंदर येथील भीमा सहकारी साखर कारखान्यातील गळीत हंगाम २०२३-२४ मध्ये उत्पादित झालेल्या पहिल्या ११ साखरेच्या पोती पूजनाचा कार्यक्रम आज (दि.८) पार पडला. कारखान्याचे अध्यक्ष विश्वराज महाडिक यांच्या उपस्थितीत कारखान्याच्या कार्यस्थळावर पुळुज गावचे नवनिर्वाचित लोकनियुक्त सरपंच विश्वास महाडिक यांच्या शुभ हस्ते हा कार्यक्रम संपन्न झाला. १ ते ५ नोव्हेंबर या कालावधीमध्ये गाळपास आलेल्या ऊसाची पहिली उचल मंगळवारी शेतकऱ्यांच्या खात्यात जमा केली.
कारखान्याच्या गळीत हंगाम २०२३-२४ शुभारंभ प्रसंगी आम्ही काटा पेमेंट करु, असा दिलेला शब्द पाळत अध्यक्ष विश्वराज महाडिक यांनी सभासदांना दाखवून दिले आहे. दरम्यान, दरवर्षी साधारणतः हंगामाच्या दुसऱ्या दिवशी साखर पोती पूजन कार्यक्रम घेतला जात असे या परंपरेला फाटा देत "आधी लगीन कोंढाण्याचे…" याप्रमाणे अगोदर शेतकऱ्यांच्या ऊसाचे बिल आणि मग साखर पूजन ही भूमिका चेअरमन विश्वराज महाडिक यांनी यावेळी घेतली. चेअरमन विश्वराज महाडिक यांनी सर्व सभासद शेतकरी, तोडणी व वाहतूक कामगार आणि सर्व कारखाना कर्मचाऱ्यांचे अभिनंदन केले. तसेच हंगाम यशस्वी करण्यासाठी सर्वतोपरी योगदान देण्याचे आवाहन केले.
या कार्यक्रमाला विद्यमान संचालक मंडळ, कार्यकारी संचालक श्री.शिंदे साहेब, अधिकारी, कर्मचारी, सभासद, शेतकरी, कार्यकर्ते व हितचिंतक उपस्थित होते.
राज्य सरकारने यावर्षी एफआरपी पूर्ण असणाऱ्या कारखान्यांना १ नोव्हेंबरपासून गाळप करण्यास परवानगी दिली. त्याप्रमाणे भीमाचे गाळप चाचणी १ नोव्हेंबर रोजी घेण्यात आली. कारखाना हंगाम सुरु होताना ट्रायल वेळी मशिनरी अथवा पम्पिंग मध्ये तांत्रिक अडचण येणे, ही सामान्य गोष्ट असते. हंगाम शुभारंभावेळी कर्मचारी वर्गाला ५० तासांपेक्षा कमी डाऊनटाईमचे उद्दिष्ट देत असतानाच विश्वराज यांनी "मी कारखान्याचा चेअरमन नव्हे, तर तुमच्याप्रमाणेच एक सेवक आहे. गरज पडेल त्या त्यावेळी तुमच्या खांद्याला खांदा लावून काम करेन, अशी खात्री दिली होती.
कर्मचाऱ्यांची देखील दिवाळी गोड.. एक पगार दिवाळी बोनस खात्यावर जमा
या वर्षी भीमाच्या सर्व कर्मचाऱ्यांना प्रत्येकी १५ किलो स्वतंत्र पॅकिंगद्वारे मोफत साखर वाटप करण्यात आले. तसेच कर्मचाऱ्यांना ८.३३ टक्के म्हणजेच एक पगार दिवाळी बोनस म्हणून देण्याची घोषणा करण्यात आली होती. ती आज साखर पोती पूजनाप्रसंगी दिवाळी बोनस सर्व कर्मचाऱ्यांच्या खात्यावर जमा केला असल्याची माहिती विश्वराज महाडिक यांनी दिली. त्यामुळे मोफत साखर, दिवाळी बोनस एक पगार यामुळे भीमाच्या कर्मचाऱ्यांची यावर्षीची दिवाळी गोड होणार आहे.
भीमा सहकारी साखर कारखान्याने यावर्षी जाहीर केलेली २५२५ रुपये पहिली उचल, चोख काटा आणि रोख मिळणारे पेमेंट यामुळे भीमाला ऊस घालण्याकडे सभासद शेतकऱ्यांचा कल जास्त आहे. १ ते ५ दरम्यान गाळपास आलेल्या उसाची पहिली उचल जमा करण्यात आली आहे. पाच दिवसांचे बिलाचे वितरण हंगाम संपेपर्यंत सुरु राहील. त्यामुळे उत्तरोत्तर सर्वच शेतकऱ्यांचा भीमाकडे ओघ वाढेल, असे चित्र आताच पाहावयास मिळत आहे. त्यामुळे शेतकऱ्यांचा ऊस वेळेत आणण्यासाठी सज्ज राहणार आहे.
हेही वाचा :
