मोहोळ : माध्यमिकचे शिक्षणाधिकारी सचिन जगताप यांच्या कारचा मोहोळ तालुक्यातील शेटफळ जवळ भिषण अपघात झाला असून त्यांनी व चालकाने सीटबेल्ट लावल्यामुळे दोघांचेही प्राण वाचले आहेत.
पुणे येथील उपसंचालक कार्यालयात सुनावणी असल्यामुळे माध्यमिकचे शिक्षणाधिकारी सचिन जगताप हे मंगळवारी १८ नोव्हेंबर रोजी सकाळी स्वतःच्या चारचाकी कारने पुण्याकडे निघाले होते. मोहोळ जवळ आल्या नंतर त्यांच्या गाडीमध्ये दोष निर्माण झाला.त्यामुळे दुसरी कार मागवून ते पुन्हा पुण्याकडे रवाना झाले.
मोहोळ तालुक्यातील शेटफळ गावाजवळ आल्यानंतर रस्त्यावरून जाणाऱ्या ऊसाच्या ट्रॉलीला शिक्षणाधिकाऱ्यांच्या कारची मागून जोरदार धडक बसली.या धडकेत कारचा पुढील भाग चक्काचूर झाला.सुदैवाने शिक्षणाधिकारी जगताप व चालकाने सीट बेल्ट लावल्यामुळे एअर बॅग उघडल्या व कोणासही इजा झाली नाही.मात्र धडक बसल्यानंतर बोनेटवर आदळल्यामुळे शिक्षणाधिकारी जगताप हे जखमी झाले.मात्र कोणतीही जीवितहानी झाली नाही.
त्यांना तत्काळ उपचारांसाठी रुग्णालयात दाखल करण्यात आले.उपचारानंतर त्यांना रुग्णालयातून सोडण्यात आले.त्यांची प्रकृती आता स्थिर असून या अपघातामुळे शिक्षणाधिकारी जगताप यांची सुनावणी लांबणीवर टाकण्यात आली आहे.
