पंढरपूर ; पुढारी वृत्तसेवा : दिवाळी पाडवा व भाऊबीजनिमित्त श्री विठ्ठल-रूक्मिणी मंदिरात व सोळखांबी व सभामंडप येथे पिवळ्या व केशरी झेंडूच्या फुलांची सुंदर आरास करण्यात आली आहे. सुमारे 1000 किलो पाना, फुलांचा वापर करुन मनमोहक आरास करण्यात आली आहे. यामुळे मंदिराचे स्वरुप नयमरम्य दिसत आहे. श्री विठ्ठल-रुक्मिणीचे दर्शन घेण्यासाठी आलेल्या भाविकांमधून ही मनमोहक आरास पाहून समाधान व्यक्त केले जात आहे.
दिवाळी पाडव्याचे औचित्य साधून विठ्ठल मंदिर समितीच्या वतीने श्रींच्या मंदिरात, सोळखांबी, सभामंडप येथे पाना, फुलांची आरास करण्यात आली आहे. श्री विठ्ठल-रुक्मिणी मंदिरात विविध सण, उत्सव काळात रंगीगेरंगी फुलांचा वापर करुन सजावट केली जाते. त्यानुसार आज पाडवा व भाऊबीज निमित्ताने मंदिरात फुलांची सजावट करण्यात आली.
श्री विठ्ठल-रुक्मिणी मंदिर समितीच्यावतीने सहअध्यक्ष गहिनीनाथ महाराज औसेकर, कार्यकारी अधिकारी संजीव जाधव यांच्या मार्गदर्शनाखाली व्यवस्थापक बालाजी पुदलवाड यांनी संपुर्ण मंदिरात, सोळखांबी, विठ्ठल सभामंडपात आकर्षक सजावट केली.
श्री विठ्ठल व रुक्मिणी मातेचे हे सजलेले अनोखो रुप पाहण्यासाठी मोठ्या संख्येने भाविक पंढरीत श्रींच्या दर्शनासाठी गर्दी करत आहेत.
श्रींच्या दर्शनाकरीता आलेल्या भाविकाना मंदिरात करण्यात आलेल्या मनमोहक आरासीचे दर्शन मिळत असल्याने भाविक मनोमनी सुखावले जात आहेत. तर मंदिर समितीच्या संकेतस्थळावरुनही घरबसल्या भाविकांना या फुलांच्या सुंदर आराशीचे दर्शन मिळत आहे.
श्री विठ्ठल-रुक्मिणी मंदिरातील रुक्मिणी मातेच्या चरणावरील वज्रलेपाची झिज झाली होती. यानंतर यावर वज्रलेप करण्यात आला आहे. सातत्याने होणारी झिज थांबवण्यासाठी पुरातत्व विभागाने श्रींच्या गाभार्‍यात फुलांची आरास करण्यास बंद करावी, असे म्हटले आहे. त्यानुसार मंदिर समितीने श्रींच्या गाभार्‍यात आरास न करता मंदिर, सोळखांबी व सभामंडप येथे आरास करण्यात आली आहे. सध्या दिवाळी निमित्त सुट्टी असल्याने दर्शनासाठी भाविक मोठ्या संख्येने येत आहेत.
हेही वाचा :
