Nicotine gum dangers
सातारा : मीना शिंदे
तंबाखू व धूम्रपानाचे व्यसन सोडवण्यासाठी डॉक्टरांच्या सल्ल्याशिवाय थेट दुकानातून विकत घेत नागरिकांकडून निकोटिन गमचा वापर केला जात आहे. या एका च्युईंगममुळे तब्बल चार सिगारेट इतके निकोटीन शरीरात जात आहे. त्यामुळे शरीरात निकोटिनचे प्रमाण वाढून आरोग्यावर गंभीर दुष्परिणाम होत आहेत.
तंबाखू व सिगारेटचे व्यसन सोडवण्यासाठी वैद्यकीय तज्ज्ञांच्या सल्ल्याशिवाय निकोटिन गम घेणे घातक ठरत आहे. सिगारेट ओढणे हल्ली तरुणांमध्ये फॅशन समजली जाते. शहरी व निमशहरी भागातही रस्त्याच्या कडेला, शाळा-कॉलेजच्या मार्गावर जागोजागी टपऱ्या वाढत आहेत. याच टपऱ्यांवर, स्नॅक सेंटरवर तरुणाई सिगारेटचे झुरके घेताना दिसते.
सुरुवातीला गंमत म्हणून केलेली सुरुवात व्यसनात रुपांतरीत होते तेव्हा ते आरोग्यावर बेतते. याची जाणीव खूप कमी लोकांना होते. मग ती सवय सोडवण्यासाठी व्यक्तिगत पातळीवर प्रयत्न सुरू होतात.
तंबाखू व तंबाखूजन्य पदार्थांमधील निकोटिन हा घटक मानवी आरोग्यास घातक ठरतो. आरोग्य बिघडण्याच्या धास्तीने अनेकजण ते सोडण्याचा निर्णय घेतात. मात्र, सवय सुटत नाही. मग थेट मेडिकलमधून निकोटिन गम घेतात. हे एक प्रकारचे च्युईंगम असून, ते खाण्यामुळे शरीरात निकोटिनचे प्रमाण नकळतपणे वाढते
