सांगली : गणेशोत्सवाच्या काळात ध्वनी मर्यादेचे उल्लंघन केल्यास डीजे जप्त करून चालकासह मंडळावर गुन्हे दाखल केले जातील, असा इशारा पोलिस उपअधीक्षक विमला एम. यांनी दिला.
गणेशोत्सवाच्या पार्श्वभूमीवर सांगली शहर पोलिस ठाण्यात डीजे चालकांची बैठक आयोजित करण्यात आली होती, यावेळी त्या बोलत होत्या. बैठकीला सांगली शहरचे पोलिस निरीक्षक संजय मोरे, विश्रामबागचे सुधीर भालेराव, संजयनगरचे सूरज बिजली, वाहतूक शाखेचे मुकुंद कुलकर्णी उपस्थित होते. ध्वनी प्रदूषण नियंत्रण नियमांचे उल्लंघन झाल्यास कडक कारवाई केली जाईल, असा स्पष्ट इशाराही पोलिसांनी बैठकीत दिला.
या बैठकीत पोलिसांनी डीजे चालकांना कायद्याबाबत मार्गदर्शन केले. डीजे, साऊंड सिस्टिम वापरण्यासाठी परवानगी घेणे बंधनकारक आहे. ध्वनी मर्यादा ओलांडल्यास कठोर कारवाई केली जाईल. मिरवणुकीत बीभत्स गाणी, धार्मिक भावना दुखावणारी गाणी न वाजवण्याबाबत सूचना देण्यात आल्या. वृद्ध, गर्भवती महिला, लहान मुलांना त्रास होणार नाही, याची खबरदारी घ्यावी.
अन्यथा मंडळाच्या पदाधिकारी, डीजे चालक, मालक, ऑपरेटरवर गुन्हे दाखल करून साऊंड सिस्टिम जप्त केली जाईल, असा इशारा देण्यात आला. या बैठकीत उपस्थित असलेल्या डीजे चालकांनी नियम पाळण्याचे आश्वासन दिले.
