सांगली : केंद्रीय गृहमंत्री अमित शहा शुक्रवार दि. 8 नोव्हेंबर रोजी भाजप-महायुतीच्या प्रचारार्थ सांगली जिल्ह्याच्या दौर्‍यावर येत आहेत. सत्यजित देशमुख यांच्या प्रचारार्थ शिराळा येथे सकाळी 10 वाजता, त्यानंतर आमदार सुधीर गाडगीळ यांच्या प्रचारार्थ सांगली येथे दुपारी 2 वाजता शहा यांची सभा होणार असल्याची माहिती पक्षाचे जिल्हाध्यक्ष दीपक शिंदे-म्हैसाळकर यांनी दिली.
शिंदे म्हणाले, शिराळा विधानसभा मतदारसंघाचे महायुतीचे उमेदवार सत्यजित देशमुख यांच्या प्रचारार्थ शुक्रवार, दि. 8 नोव्हेंबर सकाळी 10 वाजता शिराळा येथील विश्वासराव नाईक महाविद्यालयाच्या मैदानावर शहा यांची सभा होत आहे. शहा यांची महाराष्ट्रातील ही पहिलीच सभा आहे. सभेस खासदार धैर्यशील माने, आमदार विनय कोरे, आमदार सदाभाऊ खोत, निशिकांत पाटील, सम्राट महाडिक, राहुल महाडिक, सी. बी. पाटील, दीपक शिंदे-म्हैसाळकर, नीता केळकर, सागर खोत, जयराज पाटील, अशोक पाटील आदींसह प्रमुख नेते उपस्थित राहणार आहेत. यानंतर सांगलीत दुपारी 2 वाजता डॉ. बाबासाहेब आंबेडकर स्टेडियमवर जाहीर सभा होणार आहे. सभेला महायुतीच्या घटकपक्षांचे सर्व प्रमुख नेते, जिल्हाभरातील उमेदवार उपस्थित राहणार आहेत.
