रायगड : कशेडी घाटात नायट्रोजन गॅसची वाहतूक करणारा टँकर ७० फूट दरीत कोसळला

पोलादपूर - धनराज गोपाळ

मुंबई-गोवा राष्ट्रीय महामार्गावर उरण ते लोटे नायट्रोजन गॅस वाहतूक करणारा आयशर टेम्पो खचलेल्या रस्त्यावरून चढत असताना वाहनाने पिकअप न घेतल्याने पाठीमागे येऊन खोल दरीत कोसळला. या अपघातात चालक गंभीर जखमी झाल्याची घटना आज (बुधवार) रोजी दुपारी एक वाजण्याच्या सुमारास भोगाव गावाच्या हद्दीत घडली आहे.

याबाबत सविस्तर वृत्त असे की, चालक अफिझुर रेहमान (वय ५५ वर्षे) हा आपल्या ताब्यातील आयशर ट्रक क्रमांक एम एच ०५ ए एम २८१४ यामध्ये नायट्रोजन गॅस भरून उरण ते लोटे येथे घेऊन जात होता. यावेळी मुंबई-गोवा राष्ट्रीय महामार्गावरील कशेडी घाटात भोगाव गावच्या हद्दीत आले असता येथील खचलेल्या रस्त्यावर चढत असताना गाडीने पीक अप न घेतल्याने गाडी मागे येऊन थेट बॅरिकेड्स तोडून सुमारे ७० फूट खोल दरीत कोसळून अपघात झाला. या अपघातात चालक अफिझुर रेहमान (वय ५५ वर्षे) हा जखमी झाला आहे.

अपघाताची माहिती मिळताच कशेडी महामार्ग पोलिस मदत केंद्राचे पोलिस उपनिरीक्षक प्रविण धडे, उपनिरीक्षक समेळ सुर्वे, पोलिस हवालदार चिकणे, रामागडे, माजलकर यांच्यासह पोलादपूर पोलिस ठाण्याचे पोलिस निरीक्षक अनिल जाधव, सहाय्यक फौजदार जयसिंग पवार, पोलिस हवालदार रविंद्र सरणेकर, पोलिस हवालदार घुले, ट्रॅफिक हवालदार धायगुडे, काळभैरवनाथ रेस्क्यू टीमचे दीपक उतेकर ,१०८ रुग्णवाहिकेची संपूर्ण टीम, महाड नगर परिषद आणि महाड एमआयडीसी येथील अग्निशामक यंत्रणेला कशेडी व पोलादपूर पोलिसांनी पाचारण केले. येथील तीन अग्निशामक बंब घटनास्थळी दाखल झाले असून महामार्ग पोलिसांकडून दोन्ही बाजूची वाहतूक सुरळीत सुरू ठेवली आहे.