पनवेल : नवी मुंबई आंतरराष्ट्रीय विमानतळाच्या मार्गावर दुपारी चारच्या सुमारास विचित्र अपघात झाला. नव्याने तयार झालेल्या या मार्गावर बेफाम वेगाने जाणाऱ्या तीन गाड्या एकमेकांवर आदळल्या. सुदैवाने या घटनेत कोणतीही जीवितहानी झाली नाही.
पनवेल शहराकडून विमानतळाकडे जाणाऱ्या रस्त्यावरून वेगाने जाणाऱ्या एका कारने समोरून येणाऱ्या टेम्पोला जोरदार धडक दिली. त्याचवेळी मागून येणारी आणखी एक कार या दोन्ही वाहनांवर आदळली.
या अपघातात मध्ये छोटा टेम्पो उलटला. त्यामुळे रस्ता काही वेळासाठी पूर्णतः बंद झाला होता. स्थानिक रहिवाशांनी वाहनचालकांनी तत्काळ बचावकार्य सुरू करून जखमी टेम्पोचालकाला बाहेर काढले. त्याला किरकोळ दुखापत झाली असून रुग्णालयात हलविण्यात आले आहे.
घटनेची माहिती मिळताच पोलिसांनी घटनास्थळी धाव घेतली आणि वाहतूक सुरळीत करण्यासाठी प्रयत्न सुरू केले. नव्याने उभारल्या जाणाऱ्या नवी मुंबई आंतरराष्ट्रीय विमानतळ मार्गावर हा पहिलाच अपघात आहे. या रस्त्यावरून मोठ्या प्रमाणात बांधकाम साहित्य, वाहनांची वाहतूक सुरू असते. त्यामुळे वाहतूक नियमांचे काटेकोर पालन व सावधगिरी बाळगण्याचे आवाहन पोलिसांकडून करण्यात आले आहे.
प्राथमिक तपासानुसार, वेग आणि बेफिकिरी हे या अपघातामागचे मुख्य कारण असल्याचे निष्कर्ष समोर येत आहेत.
