अलिबाग : बालकांचा मोफत व सक्तीच्या शिक्षणाचा अधिकार अधिनियमांतर्गत (आरटीई) दुर्बल आणि वंचित घटकातील बालकांना स्वयं अर्थसहाय्यित शाळा, विना अनुदानित शाळांमध्ये 2026-27 या वर्षासाठी प्रवेश प्रक्रिया ऑनलाईन पद्धतीने राबविण्यात येत आहे. रायगड जिल्ह्यातील एकूण 269 शाळांची आरटीईअंतर्गत प्रवेशासाठी निवड करण्यात आली आहे.
बालकांच्या पालकांना यासाठी संबंधित अर्ज भरण्याची प्रक्रिया 17 फेबु्रवारी ते 10 मार्च या कालावधीत सुरू असणार आहे. पालकांनी हीींंीि:/र्/ीीींवशपीं|ारहरीरीहीींर|र्सेीं|ळप/रवामेीीिंरश्र या संकेतस्थळावर उपलब्ध अर्ज काळजीपूर्वक भरावयाचे आहेत. या योजनेचा पालकांनी लाभ घ्यावा, असे आवाहन शिक्षणाधिकारी (प्राथमिक) ललिता दहितुले यांनी केले आहे.
आरटीई अंतर्गत दुर्बल व वंचित घटकांतील बालकांना स्वयं अर्थसहाय्यित शाळा, विनाअनुदानित शाळांमध्ये इयत्ता पहिली किंवा पूर्व प्राथमिक वर्ग या स्तरावर 25 टक्के प्रवेश प्रक्रियेकरिता पालकांनी ऑनलाईन अर्ज भरण्याची प्रक्रिया पूर्ण करणे आवश्यक आहे.
वंचित घटकांतील बालकांमध्ये अनुसूचित जाती (एससी), अनुसूचित जमाती (एसटी), विमुक्त जाती (अ), भटक्या जमाती (ब), (क), (ड) इतर मागासवर्ग (ओबीसी), विशेष मागासवर्ग (एसबीसी), आर्थिक व सामाजिकदृष्ट्या मागास घटक, एचआयव्ही बाधित किंवा प्रभावित बालक, अनाथ बालके, दिव्यांग बालके अथवा कोविड प्रभावित बालकांचा समावेश होतो. तर, आर्थिक वर्षामध्ये पालकांचे वार्षिक उत्पन्न एक लाखापेक्षा कमी आहे अशा बालकांचा आर्थिक दुर्बल गटामध्ये समावेश होतो.
बालकांच्या पालकांना त्यांच्या निवासस्थाच्या ठिकाणापासून एक किमीपेक्षा कमी अंतरावरील शाळा आरटीई पोर्टलवर दिसतील. या अनुषंगाने प्रक्रियेकरिता विचारपूर्वक 10 शाळांची निवड करण्यात यावी आदी सूचना देण्यात आल्या आहेत. रायगड जिल्ह्यातील एकूण 269 शाळांची आरटीईअंतर्गत प्रवेशासाठी निवड करण्यात आली आहे.
अर्ज करताना आवश्यक कागदपत्रे जोडण्यात यावीत, अचूक माहिती भरण्यात यावी, तसेच विहित मुदतीमध्ये परिपूर्ण अर्ज भरला जाईल याची दक्षता घ्यावी. प्रवेश प्रक्रियेदरम्यान काही समस्या असल्यास आरटीई पोर्टलवर मदत केंद्रांची माहिती देण्यात आलेली आहे. त्यांच्याशी संपर्क करुन समस्येचे निराकरण करता येईल.
ललिता दहितुले, शिक्षणाधिकारी (प्राथमिक)
