शंकर कवडे
पुणे : लालचुटूक, गोड चवीच्या राजस्थानी गाजराचा हंगाम सुरू झाल्याने गुलटेकडी मार्केट यार्डातील तरकारी विभागात गाजराची आवक वाढू लागली आहे. रविवारी बाजारात सहा ते सात टेम्पोमधून गाजर विक्रीसाठी दाखल झाले. त्याच्या दहा किलोला तीनशे ते पाचशे रुपये भाव मिळाला तर किरकोळ बाजारात एक किलो गाजराची 100 ते 120 रुपये दराने विक्री सुरू आहे. बाजारात सहा ते सात टेम्पोमधून आवक; दहा किलोला तीनशे ते पाचशे रुपये भाव
मार्केट यार्डात फळभाज्यांची आवक मागील आठवड्याच्या तुलनेत स्थिर आहे. त्या तुलनेत मागणी जास्त असल्यामुळे भेंडी, गवार, टोमॅटो, दोडका, दुधी भोपळा, काकडी, कारली, वांगी, शेवगा, कोबी आणि फ्लॉवरच्या भावात दहा ते वीस टक्क्यांनी वाढ झाली आहे. तर मटारचा हंगाम सुरू झाला आहे. त्यामुळे मटारची आवक वाढली आहे. त्यामुळे मटारच्या भावात घट झाली आहे. मागणी आणि पुरवठा यातील समतोलामुळे उर्वरित फळभाज्यांचे भाव मागील आठवड्याच्या तुलनेत स्थिर असल्याची माहिती ज्येष्ठ अडतदार विलास भुजबळ यांनी दिली.
बाजारात रविवारी (दि. 16) राज्याच्या विविध भागांसह परराज्यांतून सुमारे 90 ट्रक फळभाज्यांची आवक झाली. परराज्यांतून झालेल्या आवकेमध्ये कर्नाटक, आंध्र प्रदेश आणि मध्यप्रदेश येथून हिरवी मिरची सुमारे 14 ते 15 टेम्पो, कर्नाटक येथून कोबी 4 ते 5 टेम्पो, आंध्र प्रदेश आणि तामिळनाडू येथून शेवगा 2 ते 3 टेम्पो, राजस्थान येथून गाजर 6 ते 7 टेम्पो, कर्नाटक येथून घेवडा 3 ते 4 टेम्पो, कर्नाटकातून येथून भुईमूग 2 टेम्पो, पंजाब, शिमला आणि मध्य प्रदेश येथून मटार 8 ते 10 टेम्पो, कर्नाटक येथून पावटा 2 ते 3 टेम्पो, तामिळनाडू येथून तोतापुरी कैरी 400 ते 500 टेम्पो, मध्य प्रदेश येथून लसणाची सुमारे 10 ते 12 टेम्पो तर इंदौर, आग्रा आणि स्थानिक भागातून बटाट्याची 40 ते 45 टेम्पो इतकी आवक झाली. स्थानिक भागातून झालेल्या आवकमध्ये सातारी आले सुमारे 500 ते 600 गोणी, भेंडी 5 ते 6 टेम्पो, गवार 4 ते 5 टेम्पो, टोमॅटो 7 ते 8 हजार क्रेटस, हिरवी मिरची 5 टेम्पो, काकडी 7 ते 8 टेम्पो, फ्लॉवर 8 ते 10 टेम्पो, ढोबळी मिरची 8 ते 10 टेम्पो, भुईमूग शेंग 50 ते 60 गोणी, गाजर 3 ते 4 टेम्पो, तांबडा भोपळा 10 ते 12 टेम्पो, कांदा सुमारे 100 टेम्पो इतकी आवक झाली.
पालेभाज्यांची आवक कमी होत आहे. त्या तुलनेत मागणी जास्त आहे. त्यामुळे बहतांश पालेभाज्यांचे भाव तेजीत आहेत. कोथिंबिरीच्या जुडीला घाऊक बाजारात दर्जानुसार 10 ते 20 रुपये भाव मिळत आहे. मार्केट यार्ड घाऊक बाजारात रविवारी (दि.16) कोथिंबिरीची सुमारे सव्वा लाख जुडी, तर मेथीची 50 हजार जुडींची आवक झाली. ही आवक मागील आठवड्याच्या तुलनेत कमी असल्याची माहिती व्यापाऱ्यांनी दिली. जिल्ह्यासह विभागातून पालेभाज्यांची आवक होत असते. मात्र, अवकाळी पावसाने नुकसान झाल्याने आवक कमी होत आहे. पाऊस थांबून आता बराच कालावधी उलटला आहे. त्यामुळे नवीन पीक येणार आहे. येत्या कालावधीत पालेभाज्यांची आवक वाढेल, त्यावेळी भावात घट होईल, असे व्यापाऱ्यांकडून सांगण्यात येत आहे.
