राहू : पुढारी वृत्तसेवा: दौंडचे आमदार अ‍ॅड. राहुल कुल यांच्या प्रयत्नातून दौंड तालुक्यातील सहजपूर व खामगाव येथील रेल्वे क्रॉसिंगवरील उड्डाणपुलासाठी 68 कोटी 50 लक्ष रुपये खर्चाला रेल्वे मंत्रालयाने मंजुरी दिली आहे. दौंड तालुक्यातील प्रमुख राज्य मार्ग व जिल्हा मार्गांवर सुरक्षेच्या दृष्टीने धोकादायक असणार्‍या समतल रेल्वे क्रॉसिंगवर रेल्वे उड्डाणपूल व रेल्वे भुयारी मार्ग उभारणे अत्यंत आवश्यक असल्याची मागणी आमदार अ‍ॅड. राहुल कुल यांनी रेल्वेमंत्री अश्विनी वैष्णव व राज्यमंत्री रावसाहेब दानवे यांच्याकडे केली होती.
यासाठी दिल्ली येथे वेळोवेळी पाठपुरावा केला होता. याबाबत नुकतेच रेल्वे मंत्रालयाद्वारे दौंड तालुक्यातील सहजपूर व खामगाव येथे उड्डाणपूल उभारण्यास मंजुरी देण्यात आल्याचे पत्राद्वारे कळविले आहे. सहजपूर येथील उड्डाणपुलासाठी 34 कोटी 5 लक्ष, तर खामगाव येथील उड्डाणपुलासाठी 34 कोटी 45 लक्ष, अशा एकूण 68 कोटी 50 लक्ष रुपये खर्चाची लवकरच निविदा प्रक्रिया राबविण्यात येणार आहे.
यापूर्वी दौंड तालुक्यातील भांडगाव-खुटबाव, केडगाव-बोरीपार्धी-दापोडी, वरवंड-कडेठाण-हातवळण, पाटस-कानगाव, नानवीज-गिरीम व लिंगाळी-खोरवडी या सहा रस्त्यांवरील रेल्वे क्रॉसिंगऐवजी भुयारी मार्ग उभारण्यात यावा, यासाठी आमदार अ‍ॅड. राहुल कुल यांनी पाठपुरावा केला होता. त्यातील वरवंड-कडेठाण-हातवळण, पाटस-कानगाव व नानवीज-गिरीम या तीन ठिकाणी पुणे सोलापूर रेल्वेमार्गावर रेल्वे भुयारी मार्गाचे काम प्रगतिपथावर असून, लवकरच ते पूर्णत्वास येणार आहे.
हेही वाचा
