पुणे; पुढारी वृत्तसेवा: बालसाहित्यकार आणि कवयित्री डॉ. संगीता बर्वे यांच्या 'पियूची वही' या पुस्तकाला साहित्य अकादमीचा बालसाहित्य पुरस्कार जाहीर झाला आहे. साहित्य अकादमीच्या वतीने बुधवारी बालसाहित्य पुरस्कारांची घोषणा करण्यात आली. देशातील 22 भाषांमधील बालसहित्यकारांना हा पुरस्कार जाहीर झाला आहे. त्यात मराठी भाषेसाठी बर्वे यांच्या 'पियूची वही' या साहित्यकृतीला हा बहुमान प्राप्त झाला आहे. 'साहित्य अकादमीचा पुरस्कार जाहीर झाल्याचा आनंद आहे,' अशी भावना बर्वे यांनी व्यक्त केली.
'मुलांनी दैनंदिनी लिहावी, या उद्देशाने 'पियूची वही' हे पुस्तक लिहिले. या पुस्तकामुळे अनेक मुलांनी दैनंदिनी लिहिण्यास सुरुवात केली आहे. त्याचाही मोठा आनंद आहे. या पुरस्कारामुळे हे पुस्तक आणखी मुलांपर्यंत पोहोचेल आणि ते वाचून मुले रोजचा दिनक्रम लिहिण्यास सुरुवात करतील. मुलांनी लिहिते व्हावे हाच या पुस्तक निर्मितीमागचा असलेला हेतू साध्य झाला आहे. मुले मोठ्या संख्येने लिहिती होत आहेत याचा मनस्वी आनंद आहे,' असेही डॉ. बर्वे यांनी सांगितले.
