पुणे, पुढारी वृत्तसेवा: पुणे लीग कबड्डी स्पर्धेत महिला विभागात लय भारी पिंपरी चिंचवड संघाने वेगवान पुणे संघाचा पराभव करीत विजय मिळविला. राष्ट्रवादी काँग्रेस आणि बाबूराव चांदेरे सोशल फाउंडेशनच्या वतीने म्हाळुंगे- बालेवाडीतील श्री शिवछत्रपती क्रीडा संकुलात ही स्पर्धा सुरू आहे. पुरुष विभागात बलाढ्य बारामती संघाने लयभारी पिंपरी चिंचवड संघावर 43-30 अशी मात केली. मध्यंतराला बारामती संघाकडे 22-11, अशी आघाडी होती. बारामती संघाच्या शुभम नेवाळे व बबलू गिरी याने चौफेर चढाया करीत संघाला विजय मिळवून दिला. सिंहगड हवेली संघाने माय मुळशी संघावर 38-33, असा विजय मिळविला.
मध्यंतराला सिंहगड हवेली संघाकडे 21-9, अशी आघाडी होती. सिंहगड हवेली संघाच्या पृथ्वीराज चव्हाण याने जोरदार खेळ करीत संघाच्या विजयात मोलाचा वाटा उचलला. महिला विभागात लय भारी पिंपरी चिंचवड संघाने वेगवान पुणे संघाचा 48-40 असा पराभव केला. मध्यंतराला पिंपरी चिंचवड संघाकडे 22-18, अशी आघाडी होती. संघाकडून सलोनी गजमल व निकिता पडवळ यांनी सुरेख चढाया केल्या, तर आदिती चौघुले व विद्या गायकवाड यांनी चांगल्या पकडी घेतल्या.
पुणे संघाच्या समृध्दी कोळेकर व सानिका खाडे यांनी जोरदार चढाया केल्या. तर माहेश्वरी वाघ व अंकिता चौव्हान यांनी चांगल्या पकडी घेतल्या. माय मुळशी संघाने झुंजार खेड संघावर 81-33, अशी मात करीत विजय मिळविला. मध्यंतराला मुळशी संघाकडे 32-20, अशी आघाडी होती. संघाच्या ऋतिका होनमाने व स्नेहल गोपाळघरे यांनी चांगला खेळ केला. तर धनश्री तेली व साश्री लाठवडे यांनी चांगल्या पकडी घेतल्या.