पुणे : डॉ. स्मितादेवी जाधव यांचे शैक्षणिक, प्रशासकीय आणि सामाजिक क्षेत्रातील नेतृत्व बहुआयामी आहे. शिक्षण क्षेत्रातील बदलत्या गरजा ओळखून नवोन्मेष, तंत्रज्ञान आणि धोरणात्मक नेतृत्वाचा प्रभावी मेळ घालत त्यांनी उच्च शिक्षणाला अधिक समावेशक, आधुनिक आणि भविष्योन्मुख करण्यावर भर दिला आहे. डॉ. डी. वाय. पाटील विद्यापीठ, पिंपरी, पुणे यांच्या प्र-कुलगुरू म्हणून त्या कार्यरत असून डॉ. डी. वाय. पाटील विद्यापीठ सोसायटीच्या सचिवपदाची जबाबदारीही त्या सांभाळतात.
शिक्षणासोबतच उद्योग आणि तंत्रज्ञानाशी असलेली त्यांची सांगड त्यांच्या कार्याची वेगळी ओळख ठरते. सावित्रीबाई फुले पुणे विद्यापीठातून शिक्षणशास्त्रातील पीएचडी, आर्थिक व्यवस्थापनातील एमबीए आणि संगणक अभियांत्रिकीची पदवी अशी त्यांची शैक्षणिक पार्श्वभूमी आहे. उच्च शिक्षणापासून माध्यम विश्वापर्यंत आणि महिला सक्षमीकरणापासून संस्थात्मक नेतृत्वापर्यंत विविध क्षेत्रांत ठसा उमटविणाऱ्या डॉ. स्मितादेवी जाधव यांच्या उमेदवारीमुळे पुणे पदवीधर मतदारसंघातील निवडणुकीला वेगळे महत्त्व प्राप्त झाले आहे.
ऑक्सफर्ड विद्यापीठातील प्रगत नेतृत्व प्रशिक्षणामुळे त्यांच्या नेतृत्वदृष्टीला व्यापक परिमाण लाभले. डिजिटल तंत्रज्ञानाच्या माध्यमातून शिक्षणपद्धतीत बदल घडवून आणताना त्यांनी ४० हजारांहून अधिक विद्यार्थी आणि असंख्य शिक्षकांपर्यंत त्याचा प्रभाव पोहोचवला आहे.
शैक्षणिक क्षेत्रापुरते मर्यादित न राहता माध्यम, महिला सक्षमीकरण आणि समाजविकासाच्या क्षेत्रातही डॉ. जाधव यांनी ठसा उमटवला आहे. ‘पुढारी पब्लिकेशन्स प्रा. लि.’च्या संचालक, टोमॅटो ९४.३ एफएमच्या कार्यकारी संचालक तसेच ‘आपला एफएम ९१.९’शी संबंधित नेतृत्वाची जबाबदारी त्या सांभाळतात. ‘कस्तुरी क्लब’च्या अध्यक्षा म्हणून १८ हजारांहून अधिक महिलांना उद्योजकता, नेतृत्व आणि सामाजिक सहभागासाठी व्यासपीठ उपलब्ध करून देण्याच्या उपक्रमात त्यांचा सहभाग आहे. शिक्षण, माध्यमे आणि समाजकारण यांना परस्परपूरक मानणाऱ्या त्यांच्या कार्यशैलीमुळे त्यांचे नेतृत्व केवळ संस्थात्मक चौकटीत न राहता व्यापक सामाजिक परिवर्तनाशी जोडले गेले आहे.
शिक्षण आणि महिला सक्षमीकरणातील योगदानाची विविध पुरस्कारांनी दखल घेतली आहे. ‘वेणूताई चव्हाण युवती पुरस्कार’, ‘भारत सन्मान निधी पुरस्कार’, महिला सक्षमीकरणासाठीचा गौरव, ‘ग्लोबल वुमन इन्स्पिरेशन ॲवॉर्ड’, ‘एज्युप्रेन्युअर ऑफ द इयर’, ‘आऊटस्टँडिंग लीडरशिप इन हायर एज्युकेशन’ आणि ‘बेस्ट सीईओ प्राईड ऑफ इंडिया ॲवॉर्ड’ यांसारख्या सन्मानांनी त्यांच्या कार्याची नोंद घेतली आहे. शिक्षणातील नवोन्मेष, प्रशासकीय कौशल्य, युवा नेतृत्वाची जडणघडण आणि महिलांच्या सक्षमीकरणासाठीची बांधिलकी या विविध पैलूंमधून डॉ. स्मितादेवी जाधव यांची नेतृत्वशैली आकाराला आली आहे.
