वाघोली : पुढारी वृत्तसेवा : वाघोलीतील सहा व खराडीतील पाच जाहिरात फलकांवर महापालिकेकडून कारवाई करण्यात आली होती. कारवाई केल्यानंतर कारवाईचा खर्च वसूल करण्यासाठी संबंधित अकरा जाहिरातदारांच्या मिळकतींवर बोजा चढवून महापालिका खर्च वसूल करणार आहे. परवाना व आकाशचिन्ह विभागाकडून अनधिकृत जाहिरात फलक निष्कासन कारवाई झाल्यानंतर सदरचा कारवाई खर्च संबंधित अनधिकृत जाहिरात फलक लावणार्‍या संस्था/व्यक्तीकडून वसूल केला जातो. सदरचा निष्कासन कारवाई खर्च जाहिरात फलक लावणार्‍या संस्था/व्यक्तीने विहित मुदतीत न भरल्यास कारवाईचा खर्च संबंधित जाहिरात फलक अभिकरणाकडून वसूल करण्याची तरतूद करण्यात आलेली आहे.
जाहिराती लावणार्‍यांमध्ये राजू तामगोले (खराडी), संतोष दरेकर (खराडी), सागर बोराटे/विशाल बोराटे (खराडी), रामदास पठारे (खराडी), लक्ष्मण पठारे/शेखर मते (खराडी), पूजा समीर भाडळे (वाघोली) यांच्याकडून प्रत्येकी 9 लाख 38 हजार, तर संपत गाडे/मनीषा गाडे (वाघोली) यांचे दोन मिळकतप्रमाणे 18 लाख 76 हजार, तर महेंद्र परशुराम भाडळे यांचे तीन मिळकतनुसार 28 लाख 14 हजार अशी एकूण 1 कोटी 3 लाख 18 हजार रक्कम वसूल केली जाणार आहे. त्याबरोबर खराडी येथील मे. क्रिशिव पब्लिसिटी तर्फे कौशिक सुनील दत्त यांचे 4 जाहिरात फलक आहेत.
नगर रोड कार्यक्षेत्रात असणारे खराडी, वाघोली भागातील 11 जागा मालकांच्या 11 जाहिरात फलकांचे एकूण शुल्क रक्कम 1 कोटी 3 लाख 18 हजार इतका भरणा संबंधित जाहिरातदार यांनी केलेला नाही. त्यामुळे संबंधितांच्या मिळकतीवर बोजा चढवून रक्कम वसूल केली जाणार आहे.
हेही वाचा
