लोणी काळभोर/उरळी कांचन: पुणे आणि पिंपरी-चिंचवड परिसराला हादरवून सोडणाऱ्या विषारी दारूकांड प्रकरणात पुणे ग््राामीण पोलिसांनी मोठी प्रशासकीय कारवाई करीत उरुळी कांचन पोलिस ठाण्याचे पोलिस निरीक्षक सचिन वांगडे यांची उचलबांगडी केली आहे. त्यांना मुख्यालयाशी संलग्न करण्यात आले असून, त्यांच्या जागी पोलिस निरीक्षक विजयमाला पवार यांची प्रभारी अधिकारी म्हणून नियुक्ती करण्यात आली आहे.
प्राथमिक तपासात विषारी दारूचा पुरवठा उरुळी कांचन परिसरातून झाल्याचा संशय व्यक्त करण्यात आला आहे. या पार्श्वभूमीवर वरिष्ठ अधिकाऱ्यांनी ही कारवाई केल्याचे समजते. या प्रकरणात आत्तापर्यंत 22 जणांचा मृत्यू झाला असून, राज्यभरातून संताप व्यक्त होत आहे.
तपासादरम्यान अवैध दारूनिर्मिती, साठवणूक आणि पुरवठासाखळीचे विस्तृत जाळे उघडकीस येत आहे. यामुळे संबंधित यंत्रणांच्या कार्यपद्धतीवर प्रश्नचिन्ह निर्माण झाले असून, अवैध दारू व्यवसायाकडे दुर्लक्ष, नियंत्रणात अपयश आणि निष्काळजीपणाच्या आरोपांवरून यापूर्वीही विविध विभागांतील अधिकाऱ्यांवर कारवाई करण्यात आली आहे.
मिळालेल्या माहितीनुसार, या प्रकरणात पुणे पोलिस, पिंपरी-चिंचवड पोलिस आणि राज्य उत्पादन शुल्क विभागातील मिळून 22 अधिकारी व कर्मचाऱ्यांना निलंबित करण्यात आले आहे. यामध्ये पोलिस निरीक्षक, पोलिस उपनिरीक्षक तसेच उत्पादन शुल्क विभागातील अधिकाऱ्यांचा समावेश आहे.
उरुळी कांचन परिसरातून विषारी दारूचा पुरवठा झाल्याच्या संशयावरून थेट पोलिस निरीक्षक स्तरावरील अधिकाऱ्यावर कारवाई झाल्याने पोलिस दलात खळबळ उडाली आहे. या कारवाईमुळे अवैध दारू व्यवसायाला पाठीशी घालणाऱ्या किंवा त्याकडे दुर्लक्ष करणाऱ्यांना स्पष्ट इशारा मिळाल्याची चर्चा आहे. दरम्यान, नव्याने पदभार स्वीकारलेल्या पोलिस निरीक्षक विजयमाला पवार यांच्यासमोर परिसरातील अवैध दारू व्यवसायाचे समूळ उच्चाटन, पुरवठासाखळी उद्ध्वस्त करणे आणि संबंधित दोषींवर कठोर कारवाई करण्याचे आव्हान असणार आहे. स्थानिक नागरिकांनीही या प्रकरणातील सर्व दोषींवर कठोर कारवाईची मागणी केली आहे.
