लोणी काळभोर: अष्टविनायकांपैकी एक असलेल्या थेऊर (ता. हवेली) येथील श्री चिंतामणी गणपती मंदिराच्या जतन, संवर्धन आणि दुरुस्तीची कामे पूर्ण झाली असून, मंदिर बुधवार, दि. १० जून सकाळी १० वाजल्यापासून भाविकांच्या दर्शनासाठी पुन्हा खुले करण्यात आले आहे.
महाराष्ट्र शासन आणि पुरातत्व विभागाच्या माध्यमातून मंदिराच्या संवर्धनासाठी मंजूर करण्यात आलेल्या निधीतून गाभारा, सभामंडप तसेच मंदिर परिसरातील विविध भागांची दुरुस्ती आणि सुशोभीकरणाची कामे करण्यात आली आहेत.
चिंचवड देवस्थान ट्रस्टचे विश्वस्त केशव विध्वंस यांनी ही माहिती दिली. दि. १० मे ते ९ जून या कालावधीत मंदिराच्या ऐतिहासिक आणि धार्मिक वैशिष्ट्यांचे जतन करीत संवर्धनाची कामे पूर्ण करण्यात आल्याचे त्यांनी सांगितले.
भाविकांना अधिक सुलभ, सुरक्षित आणि सुविधायुक्त दर्शन मिळावे, यासाठी मंदिर परिसरातील विविध मूलभूत सुविधांमध्ये सुधारणा करण्यात आली आहे. तसेच, भाविकांना अधिक चांगला आध्यात्मिक अनुभव मिळावा, यासाठी विशेष नियोजन करण्यात आल्याचे मंदिर प्रशासनाने स्पष्ट केले. मंदिर दर्शनासाठी खुले करण्यापूर्वी विविध धार्मिक विधींचे आयोजन करण्यात आले आहे.
मुख्य पुजारी आगलावे बंधू यांच्या माहितीनुसार श्री महागणेश याग, सहस्रावर्तन, मंत्रजागर तसेच महाप्रसाद वितरणाचे कार्यक्रम होणार आहेत. यानिमित्ताने मंदिर परिसरात भक्तिमय वातावरण निर्माण होणार असून, मोठ्या संख्येने भाविक उपस्थित राहण्याची अपेक्षा आहे. जतन-संवर्धनाची कामे पूर्ण झाल्यानंतर सुमारे महिनाभराने मंदिराचे दरवाजे पुन्हा भाविकांसाठी खुले होत असल्याने गणेशभक्तांमध्ये उत्साहाचे वातावरण निर्माण झाले आहे.
