पुणे: गणेशोत्सवाच्या शहरातील मध्य भागातील मद्य विक्रीची दुकाने दहा दिवस बंद ठेवण्याचा निर्णय घेण्यात आला होता. पुणे शहरातील खडक, विश्रामबाग, फरासखाना पोलिस ठाण्यांच्या हद्दीतील मद्य विक्रीची दुकाने बंद ठेवण्याबाबतच्या निर्णयाला शहरातील बार अँड रेस्टॉरंटचालक संघटनेने उच्च न्यायालायात याचिका दाखल करून आव्हान दिले होते. या याचिकेवर मंगळवारी उच्च न्यायालयात सुनावणी झाली.
उत्सवकाळात दहा दिवस मद्य विक्री दुकाने बंद ठेण्याच्या आदेशाला स्थगिती देण्यात आली. त्यानुसार आता जिल्हाधिकारी जितेंद्र डुडी यांनी सुधारित आदेश दिले. त्यानुसार मध्य भागातील मद्य विक्री दुकाने गणेश चतुर्थी (27 ऑगस्ट), गौरी आगमन (31 ऑगस्ट), गौरी विसर्जन (2 सप्टेंबर) आणि विसर्जन सोहळ्याच्या (6 सप्टेंबर) दिवशी बंद राहणार आहेत. (Latest Pune News)
गणेशोत्सवाच्या कालावधीत वाद तसेच भांडणाच्या घटनांच्या पार्श्वभूमीवर गेल्या वर्षी पोलिस आयुक्त अमितेश कुमार यांंनी शहराच्या मध्य भागातील मद्य विक्रीची दुकाने दहा दिवस बंद ठेवण्याचा प्रस्ताव जिल्हाधिकार्यांकडे पाठविला होता. या प्रस्तावाला जिल्हाधिकार्यांनी मंजुरी दिली होती. त्यानुसार गेल्या वर्षी उत्सवकाळात संपूर्ण दहा दिवस खडक, विश्रामबाग, फरासखाना पोलिस ठाण्यांच्या हद्दीतील मद्य विक्री दुकाने (बार अँड रेस्टॉरंट, वाइन शॉप) बंद ठेवण्याचे आदेश देण्यात आले होते.
यावर्षी मध्य भागातील मद्य विक्री दुकाने दहा दिवस बंद ठेवण्याचे आदेश देण्यात आले होते. त्यावर उच्च न्यायालयाने आता स्थगिती दिल्यानंतर नवीन आदेश काढण्यात आला आहे. त्यानुसार मध्य भागातील मद्य विक्री दुकाने प्राणप्रतिष्ठा सोहळा (27 ऑगस्ट), गौरी आगमन (31 ऑगस्ट), गौरी विसर्जन (2 सप्टेंबर) आणि विसर्जन सोहळ्याच्या (6 सप्टेंबर) दिवशी बंद राहणार आहेत.
7 सप्टेंबरपर्यंत मद्य विक्री दुकाने बंद ठेवण्याचे आदेश
गणेश चतुर्थी (27 ऑगस्ट) आणि अनंत चतुर्दशीच्या दिवशी (6 सप्टेंबर) या दोन्ही दिवशी संपूर्ण जिल्ह्यातील मद्य विक्री दुकाने बंद (ड्राय डे) ठेवण्याचे आदेश देण्यात आले आहेत, तसेच 7 सप्टेंबर रोजी विसर्जन मिरवणूक संपेपर्यंत पुणे महापालिका क्षेत्रातील मिरवणुकीच्या मार्गावरील सर्व मद्य विक्री दुकाने बंद ठेवण्याचे आदेश देण्यात आले आहेत. याशिवाय ज्या भागात पाचव्या आणि सातव्या दिवशी विसर्जन पार पडते, त्या भागातील मिरवणुकीच्या मार्गावरील दुकाने मिरवणुकीदरम्यान बंद ठेवण्याचे आदेशही लागू करण्यात आले आहेत.
