ऊन, वारा, पाऊस याची तमा न बाळगता अनेक अडी-अडचणी, अडथळे, आर्थिक संकटांवर मात करत राज्याच्या डोंगरदर्यातील वाड्या-वस्त्यांपासून आदिवासी पाड्यांपर्यंत एसटी आपली प्रवासी सेवा देत आहे. सुरुवातीला केवळ 36 बेसफोर्ड बसेसवर सुरू झालेला हा प्रवास 76 वर्षांत 15 हजार बसपर्यंत पोहोचला आहे. या बसेसच्या माध्यमातून 560 पेक्षा जास्त बसस्थानकांवरून दररोज सरासरी 55 लाख प्रवाशांची वाहतूक केली जाते. 75 वर्षांवरील ज्येष्ठ नागरिक, महिला, दिव्यांग, शालेय विद्यार्थी, विद्यार्थिनी, पत्रकार अशा 30 पेक्षा जास्त समाजघटकांना एसटीच्या प्रवाशी सेवेमध्ये 33 टक्क्यांवरून 100 टक्क्यांपर्यंत शासनाद्वारे सवलत दिली जाते.