पुणे : पुण्यातील डायस प्लॉट, गुलटेकडी परिसरात राहणारे बांधकाम कंत्राटदार तथा व्यावसायिक खलील रज्जुलाल शेख यांनी गळफास घेऊन जीवन संपविल्याची धक्कादायक घटना समोर आली आहे. जीवन संपविण्यापूर्वी त्यांनी चित्रीत केलेला व्हिडिओ आणि लिहिलेली सुसाईड नोट समोर आल्यानंतर या प्रकरणाने मोठे राजकीय आणि व्यावसायिक वळण घेतले आहे.
व्हिडिओमध्ये त्यांनी आपल्या भागीदारांकडे तब्बल ५० लाख रुपये अडकल्याचा, धमक्या देऊन मानसिक छळ केल्याचा गंभीर आरोप केला आहे. या प्रकरणी स्वारगेट पोलिसांनी माजी आमदार रवींद्र धंगेकर यांच्या पत्नी, बाळासाहेब शेडगेसह १४ जणांविरुद्ध स्वारगेट पोलिस ठाण्यात जीवन संपविण्यास प्रवृत्त केल्याचा गुन्हा दाखल केला आहे.
पोलिसांनी दिलेल्या माहितीनुसार, खलील शेख यांच्या पत्नी सुलताना खलील शेख यांनी स्वारगेट पोलिस ठाण्यात फिर्याद दिली आहे. त्यानुसार विशाल केदारी, सुनील अय्यर व त्यांचा मुलगा, रघू गौडा, सुनील बोरा, राजन सेठिया, हमीद भाई शेख व त्यांचा मुलगा, बाळासाहेब शेडगे व त्यांची पत्नी, माजी आमदार रवींद्र धंगेकर व त्यांची पत्नी, शाम कोळेकर आणि शुभम नावाच्या व्यक्तीविरुद्ध भारतीय न्याय संहितेतील जीवन संपविण्यास प्रवृत्त करण्यासह अन्य कलमान्वये गुन्हा दाखल करण्यात आला आहे.
दाखल गुन्ह्यानुसार, सन २०१५ पासून १५ जुलै २०२६ या कालावधीत व्यवसायातील आर्थिक व्यवहारांवरून आरोपींकडून खलील शेख आणि त्यांच्या कुटुंबीयांना सातत्याने धमक्या, शिवीगाळ आणि मानसिक त्रास देण्यात आला. तसेच व्यवसायातील साहित्यही जबरदस्तीने नेल्याचा आरोप करण्यात आला आहे. या सातत्यपूर्ण छळामुळे खलील शेख नैराश्यात गेले आणि त्यांनी राहत्या घरी गळफास घेऊन जीवन संपविल्याचे फिर्यादीत नमूद आहे.
जीवन संपविण्यापूर्वी रेकॉर्ड केलेल्या व्हिडिओमध्ये खलील शेख यांनी 'उत्कर्ष' या कंपनीच्या भागीदारांकडे आपले ५० लाख रुपये येणे असल्याचा दावा केला होता. पैशांची मागणी केल्यानंतर संबंधितांकडून टाळाटाळ करण्यात आली. तसेच एकमेकांकडे बोट दाखवत जबाबदारी झटकली गेली, असा आरोपही त्यांनी केला होता.
व्हिडिओमध्ये त्यांनी बाळासाहेब शेडगे यांनी अनेकदा धमक्या दिल्याचा दावा केला होता. "पुण्यात कुठेही काम करू देणार नाही, जगणे कठीण करू," अशा स्वरूपाच्या धमक्या मिळाल्याचे त्यांनी म्हटले होते. आपल्या मुलालाही व्यवसायात अडथळे निर्माण केले जात असल्याचा आरोप त्यांनी केला असून व्हिडिओच्या शेवटी मानसिक तणाव असह्य झाल्याचे सांगत, आपल्याला किंवा आपल्या मुलाला काही झाल्यास त्यासाठी संबंधित व्यक्तींना जबाबदार धरावे, असे त्यांनी म्हटले होते.
दरम्यान, व्हिडिओतील आरोपांवर माध्यमावर प्रतिक्रिया देताना माजी आमदार रवींद्र धंगेकर यांनी सर्व आरोप फेटाळले आहेत. संबंधित प्रकल्पातील भागीदारी यापूर्वीच संपुष्टात आली होती. तसेच प्रकल्पासंदर्भातील वाद न्यायालयीन आणि प्रशासकीय स्तरावर प्रलंबित असल्याचे त्यांनी स्पष्ट केले आहे.
