पुणे: शनिवारवाड्याच्या आवारात नमाज पठण केल्याप्रकरणी तीन महिलांविरुद्ध गुन्हा दाखल करण्यात आला आहे. याबाबत पुरातत्त्व विभागाच्या अधिकाऱ्यांनी विश्रामबाग पोलीस ठाण्यात फिर्याद दिली. त्यांनी दिलेल्या फिर्यादीनुसार, तीन अनोळखी महिलांविरुद्ध गुन्हा नोंदवण्यात आला आहे. (Latest Pune News)
पोलिसांनी दिलेल्या माहितीनुसार, शनिवारवाडा ऐतिहासिक स्मारकात आहे. या ठिकाणी मनाई असताना तीन अनोळखी महिलांनी चटई अंथरूण नमाज पठण केले. शनिवारी (१८ ऑक्टोबर) दुपारी पावणेदोन ते पाच वाजण्याच्या दरम्यान ही घडली. त्यानंतर पुरातत्त्व विभागाच्या अधिकाऱ्यांनी रविवारी (१९ ऑक्टोबर) उशिरा याबाबत फिर्याद दिली. त्यानंतर या प्रकरण पोलिसांकडून प्राचीन स्मारके, पुरातत्वशास्त्रीय स्मारके आणि अवशेष कायद्यानुसार गुन्हा दाखल केला आहे.
पोलीस उपनिरीक्षक पाटील तपास करीत आहेत. ऐन दिवाळीत शनिवारवाड्याच्या आवारात महिलांनी नमाज पठण केल्याची चित्रफीत प्रसारित झाल्यानंतर भारतीय जनता पक्षाच्या खासदार मेधा कुलकर्णी यांनी समाज माध्यमात प्रतिक्रिया व्यक्त केली होती. त्यानंतर मेधा कुलकर्णी यांच्यासह पतित पावन संघटनाच्या कार्यकर्त्यांनी शनिवारवाड्याच्या आवारात रविवारी आंदोलन केले. शनिवारवाड्याच्या परिसरात कार्यकर्त्यांनी शिववंदना केली.
'शनिवारवाडा हा मराठा साम्राज्य तसेच पेशव्यांनी दाखविलेल्या शौर्याचे प्रतीक आहे. पुण्यात सर्व जातीधर्माचे बांधव गुण्यागोविंद्याने राहतात. मेधा कुलकर्णी या खासदार आहेत. याचा विसर त्यांना पडला आहे. कोथरूडनंतर त्या कसब्यात येऊन हिंदू-मुस्लिम बांधवांमध्ये तेढ निर्माण करत आहेत. या प्रकरणी कुलकर्णी यांच्यासह कार्यकर्त्यांविरुद्ध गुन्हा दाखल करण्यात यावा' अशी मागणी राष्ट्रवादी काँग्रेस (अजित पवार) पक्षाच्या प्रवक्त्या रुपाली पाटील ठोंबरे यांनी केली आहे.
