निरा: सातारा-पुणे डेमो रेल्वेचे इंजिन शिंदवणे घाट उतरल्यानंतर अचानक बंद पडल्याने प्रवाशांना सोमवारी (दि.१०) प्रचंड मनस्ताप सहन करावा लागला. सोमवारी सकाळी निरा येथून पुण्याकडे निघालेली डेमो शिंदवणे घाट उतरल्यानंतर आळंदी रेल्वेस्थानकाच्या पुढे अचानक बंद पडली.
तब्बल साडेतीन तासांच्या विलंबानंतर ही गाडी पुणे स्थानकात पोहोचली. गेल्या दोन वर्षांपासून या डेमोच्या इंजिनमध्ये वारंवार बिघाड होत असल्याने प्रवाशांनी तीव्र संताप व्यक्त केला. नीरा रेल्वेस्थानकातून पुण्याकडे जाणारी ही डेमो साधारण सकाळी दहा वाजेपर्यंत पुणे स्थानकात पोहोचणे अपेक्षित असते.
सातारा, लोणंद, निरा, वाल्हे, दौंडज, जेजुरी परिसरातील विद्यार्थी, नोकरदार, रुग्ण, व्यापारी तसेच पुण्यातून पुढे प्रवास करणाऱ्या असंख्य प्रवाशांसाठी ही रेल्वे अत्यंत महत्त्वाची आहे. मोठ्या संख्येने पासधारक प्रवासी या गाडीने दररोज प्रवास करतात.
सोमवारी डेमो आळंदीच्या पुढे बंद पडल्यानंतर गाडीचे मागील इंजिन सुरू करून ती पुन्हा आळंदी स्थानकात आणण्यात आली. त्यानंतर पुणे येथून दुसरे इंजिन आणून डेमोला जोडण्यात आले. अखेर दुपारी सुमारे दीड वाजता ही गाडी पुणे रेल्वेस्थानकात पोहोचली. रेल्वे बंद पडल्याने प्रवाशांची मोठी गैरसोय झाली. परिसरात एसटी अथवा अन्य वाहनांची सुविधा सहज उपलब्ध नसल्याने प्रवासी मेटाकुटीला आले होते.
गाडीत रुग्ण अडकल्याने त्यांनाही त्च्यारास झाला. नोकरदारांची कामावर जाण्याची वेळ चुकली. विद्यार्थ्यांना महाविद्यालयात वेळेत पोहोचता आले नाही. याबाबतचा व्हिडीओ समाजमाध्यमांवर प्रसारित करून प्रवाशांनी रेल्वे प्रशासनाचा निषेध केला. वारंवार बिघाड होणारे इंजिन पुणे-मिरज मार्गावर पुन्हा चालवू नये. प्रवाशांशी खेळ सुरू ठेवल्यास तीव्र आंदोलनाचा इशारा देण्यात आला आहे.
