सासवड: पुरंदर तालुक्यात गावोगावी खासगी सावकारांचा सुळसुळाट वाढत असून, आर्थिक मंदीच्या काळातही या सावकारी व्यवसायाला ’अच्छे दिन’ आले असल्याचे चित्र आहे. अवाजवी व्याजदरांच्या विळख्यात अडकलेल्या गोरगरिबांचे संसार उद्ध्वस्त होत असून, अनेक कुटुंबे आर्थिक व मानसिक संकटात सापडली आहेत.
तालुक्यातील सासवडसह ग््राामीण भागातील वाड्या-वस्त्यांपर्यंत खासगी सावकारांचे जाळे घट्ट विणले गेले आहे. दहा ते तीस टक्क्यांपर्यंतच्या प्रचंड व्याजदराने पैसे देण्याची पद्धत रूढ झाली आहे. कर्ज देताना कोरे धनादेश, घरांची कागदपत्रे किंवा शेती स्टॅम्पवर लिहून घेण्याचे प्रकार सर्रास सुरू आहेत. मात्र, वाढत्या व्याजाच्या ओझ्यामुळे मूळ रक्कम फेडणे अशक्य ठरत असून, कालांतराने कर्जदारांची मालमत्ता बळकावण्याचे प्रकार घडत आहेत.
गेल्या दहा ते पंधरा वर्षांत तालुक्यात जमीन खरेदी-विक्रीचे व्यवहार मोठ्या प्रमाणावर झाले. त्यात बोगस व्यवहारांचे प्रमाणही वाढले असून, काही जण या माध्यमातून कोट्यधीश झाले आहेत. याच पैशांतून अनेकांनी सावकारीचा गोरखधंदा सुरू केल्याची चर्चा आहे. दहशतीच्या वातावरणात कर्जदारांना गप्प बसवले जात असून, काहींनी गाव सोडून पलायन केल्याच्या घटना घडल्या आहेत. तर, काही गंभीर प्रकरणे उघडकीसही आली नसल्याचे स्थानिकांकडून सांगितले जाते.
सावकारांवर कठोर कारवाई करणार: आ. शिवतारे
खासगी सावकारीने पुरंदर तालुक्यात थैमान घातले आहे. आमदार झाल्यापासून या प्रकारावर नियंत्रण आणण्याचा प्रयत्न केला आहे. व्याजाचा बेकायदेशीर व्यवसाय करणारे कोणीही असले, तरी ते कायद्यापेक्षा मोठे नाहीत. अशा सावकारांविरोधात तक्रारी दाखल केल्यास संबंधितांचे पैसे माफ करून पिळवणूक थांबवली जाईल. बाधितांनी सासवड व जेजुरी पोलीस ठाण्यात किंवा माझ्या कार्यालयाशी संपर्क साधावा, असे आवाहन आमदार विजय शिवतारे यांनी केले.
भीती न बाळगता माहिती द्या: पोलिस निरीक्षक कुमार कदम
सासवड शहर व ग््राामीण भागात बेकायदेशीर सावकारी आणि जबरदस्तीने वसुली करणाऱ्यांविरोधात कठोर कारवाई केली जाणार आहे. नागरिकांनी कोणतीही भीती न बाळगता संबंधितांची नावे व माहिती पोलिसांना द्यावी. फिर्यादींना कायदेशीर मदत उपलब्ध करून दिली जाईल, असे सासवडचे पोलीस निरीक्षक कुमार कदम यांनी सांगितले.
