पुणे : सिंहगड रस्ता परिसरातील पीएमएवाय सोसायटीत एका पिसाळलेल्या भटक्या कुत्र्याने शनिवारी दिवसभर दहशत माजवली. या कुत्र्याने येथील पाच मुलांना चावा घेतला. तर, परिसरातील पाच भटक्या आणि दोन पाळीव कुर्त्यांवरही हल्ला केल्याची माहिती रहिवाशांनी दिली. या घटनेने परिसरातील नागरिक भयभीत झाले होते. रात्री उशिरा महापालिकेच्या पथकाने या कुत्र्याला पकडले.(Latest Pune News)
सोसायटी परिसरात सकाळपासूनच पिसाळलेला कुत्रा फिरत होता. दुपारपर्यंत अनेकांना जखमी केल्यानंतर नागरिकांनी महापालिका आणि स्वयंसेवी संस्थेला कळवले. महापालिकेच्या सहायक आयुक्त प्रज्ञा पोतदार-पवार यांना या घटनेची माहिती मिळताच, त्यांनी श्वान पथकाच्या तीन गाड्या आणि पंधरा ते वीस पथकातील कर्मचारी यांना घटनास्थळी जाऊन कार्यवाहीचे आदेश दिले.
रात्री दहाच्या सुमारास महापालिका श्वानपथक आणि युनिव्हर्सल स्वयंसेवी संस्थेच्या पथकाने तत्परतेने कारवाई करत या पिसाळलेल्या कुत्र्याला अखेर पकडले. तसेच चावा घेतलेल्या इतर भटक्या कुत्र्यांनाही ताब्यात घेण्यात आले आहे. या घटनेत जखमी झालेल्या मुलांवर ससून हॉस्पिटल आणि कमला नेहरू रुग्णालयात उपचार सुरू आहेत.
