पुणे : ‘आव्वाज कुणाचा ....महाविद्यालयाचा’ अशी घोषणा भरत नाट्य मंदिरात घुमणार आहे. कारण, तरुणाईच्या हक्काची पुरुषोत्तम करंडक आंतरमहाविद्यालयीन एकांकिका स्पर्धा ऑगस्टमध्ये रंगणार आहे. हीरक महोत्सवात पदार्पण करीत असलेल्या महाराष्ट्रीय कलोपासक आयोजित पुरुषोत्तम करंडक स्पर्धेचे वेळापत्रक जाहीर झाले आहे. स्पर्धेची प्राथमिक फेरी 10 ते 24 ऑगस्ट यादरम्यान रंगणार आहे.
स्पर्धेसाठीचे अर्ज वाटप सोमवारी (दि. 14 जुलै) आणि मंगळवारी (दि. 15 जुलै) सायंकाळी 6 ते रात्री 8 या वेळेत संस्थेच्या सुभाषनगरमधील कार्यालयात होणार आहे. स्पर्धेचे प्रवेश अर्ज 3 ऑगस्ट रोजी सायंकाळी 5 ते रात्री 9 या वेळेत नातू वाडा, 418, शनिवार पेठ येथे जमा करायचे आहेत. स्पर्धेचे लॉट्स 4 ऑगस्ट रोजी सायंकाळी 4 वाजता सुदर्शन रंगमंच (शनिवार पेठ) येथे काढण्यात येणार आहेत. स्पर्धेची प्राथमिक फेरी 10 ते 24 ऑगस्ट दरम्यान सदाशिव पेठेतील भरत नाट्य मंदिर येथे स्पर्धा होणार आहे.
अंतिम फेरी 13 आणि 14 सप्टेंबर या कालावधीत होणार असून, स्पर्धेचा पारितोषिक वितरण कार्यक्रम 19 सप्टेंबर रोजी आयोजित केला आहे.
महाराष्ट्रीय कलोपासक आणि स्पर्धेचा इतिहास पुस्तकरूपात महाराष्ट्रीय कलोपासक आणि पुरुषोत्तम करंडक स्पर्धेचा इतिहास सांगणार्या पुस्तकाचा प्रकाशन कार्यक्रम 9 ऑगस्ट रोजी सायंकाळी सहा वाजता भरत नाट्य मंदिर येथे आयोजित करण्यात आला आहे. पुस्तकाचे प्रकाशन ज्येष्ठ अभिनेत्री सुहास जोशी यांच्या हस्ते होणार आहे. या वेळी महाराष्ट्रीय कलोपासकचे चिटणीस अॅड. राजेंद्र ठाकूरदेसाई यांच्या मुलाखातीचा कार्यक्रम आयोजित केला आहे.
महाराष्ट्रीय कलोपासकचे माजी चिटणीस कै. राजाभाऊ नातू यांच्या 31 व्या स्मृतिदिनानिमित्त त्यांना अभिवादन करण्यासाठी ज्येष्ठ नाटककार सतीश आळेकर यांच्या ‘महापूर’ या नाटकाचा प्रयोग शुक्रवारी (दि.18 जुलै) सायंकाळी साडेसहा वाजता सदाशिव पेठेतील भरत नाट्य मंदिर येथे आयोजित करण्यात आला आहे. हा प्रयोग प्रेक्षकांसाठी विनामूल्य असणार आहे.
ऋषी मनोहर दिग्दर्शित या नाटकात आरोह वेलणकर, प्रसाद वनारसे, रेशम श्रीवर्धनकर, धीरेश जोशी, रेणुका दफ्तरदार, दिलीप जोगळेकर यांच्या भूमिका आहेत.
